Ўзбекистон Ташқи ишлар вазирлиги Ғазо секторида эришилган ўт очишни тўхтатиш ва гаровга олинганларни озод қилиш тўғрисидаги келишувни олқишлади.
«Ўзбекистон Америка Қўшма Штатлари Президенти Дональд Трампнинг бевосита қўллаб-қувватлаши остида эришилган Ғазо секторида ўт очишни тўхтатиш ва гаровга олинганларни озод қилиш тўғрисидаги келишувни олқишлайди», — дейилади баёнотда.
Вазирлик, шунингдек, «зудлик билан зўравонликларни тўхтатиш, гуманитар инқирозни енгиллаштириш ва сиёсий мулоқотни қайта бошлаш учун шарт-шароит яратадиган ушбу муҳим жараёнда катта рол ўйнаган Миср, Қатар ва Туркиянинг мувофиқлаштирилган фаолиятини» юқори баҳолади.
ТИВ Ўзбекистон «Яқин Шарқда халқаро ҳуқуқ нормалари ва БМТ Хавфсизлик Кенгаши резолюцияларига асосланган мустаҳкам ва адолатли тинчлик тарафдори» бўлиб келганини эслатди.
«Ишончимиз комилки, ўт очишни тўхтатиш вақтинчалик чора эмас, балки хавфсизлик, барқарор ёнма-ён яшаш ва томонлар ўртасидаги ишончни тиклашни кафолатлайдиган узоқ муддатли сиёсий тартибга солиш сари қадам бўлиши керак», — дейилади баёнотда.
Якунда вазирлик Тошкентнинг «бундан кейин ҳам Яқин Шарқ минтақасида тинчлик, барқарорлик ва гуманитар енгилликка эришишга қаратилган халқаро саъй-ҳаракатларга конструктив ёрдам кўрсатишга» тайёрлигини тасдиқлади.
АҚШ президенти Дональд Трамп бир кун аввал Исроил ва ҲАМАС унинг Ғазодаги тинч йўл билан ҳал қилиш режасининг биринчи босқичини амалга оширишга рози бўлганини эълон қилган эди. Бу босқич барча исроиллик гаровга олинганларни озод қилиш ва Исроил қўшинларини келишилган чизиққа олиб чиқишни назарда тутади. Ўзбекистон президентининг ташқи сиёсат бўйича маслаҳатчиси Абдулазиз Комилов бу ташаббусни қўллаб-қувватлаган эди.
АҚШ 2025 йил сентябрь охирида Ғазодаги урушни тўхтатиш режасини тақдим этган. У 20 бандни ўз ичига олган ва барча исроиллик гаровга олинганларни озод қилиш, Исроил қўшинларини олиб чиқиш, агар улар секторни тарк этса, ҲАМАС аъзоларига амнистия бериш, шунингдек, халқаро кучларни киритиш ва ташқи маъмурият тузишни назарда тутади.
Исроил 2023 йил октябрь ойида Фаластиннинг ҲАМАС гуруҳи ҳужумидан сўнг Ғазода уруш олиб бормоқда, бу ҳужум натижасида камида 1200 исроиллик ҳалок бўлган, яна 200 га яқин киши гаровга олинган. Маҳаллий ҳокимият маълумотларига кўра, Ғазодаги уруш давомида 64 мингдан ортиқ киши ўлдирилган. Анклавнинг бир қисмида оммавий очлик расман тасдиқланган.
