Жаҳон чемпионати саралаш турнири доирасидаги Ўзбекистон – Қирғизистон футбол учрашувига мухлислар орасида катта қизиқиш кузатилмоқда. Шу билан бирга, ушбу ажойиб футбол муҳитига таъсир этувчи нохуш ҳолатлар – чипталарни ноқонуний равишда сотиш ва қалбакилаштириш каби қоидабузарликлар ҳам аниқланмоқда.
Бу каби ҳолатлар аввалги учрашувларда кўплаб мухлисларнинг алданишига сабаб бўлган. Улар қалбаки чипталар сотиб олиб, стадионга кира олмаган ва катта ноқулайликларга дуч келган. Шунинг учун мутасадди органлар бу масалага жиддий ёндашиб, ноқонуний иш юритган шахсларга нисбатан қатъий чоралар кўрилиши ҳақида огоҳлантирмоқда.
Ўзбекистон футбол ассоциациясининг расмий хабарига кўра, футбол мухлисларидан чипталарни фақат расмий сотув нуқталари орқали харид қилиш сўралмоқда. Шубҳали шахслардан чипта сотиб олиш мухлисларни стадионга кириш ҳуқуқидан маҳрум қилиши мумкин. Шунингдек, қалбаки чипталар орқали стадионга киришга уриниш самарасиз бўлиб, мухлисларга ноқулайлик туғдириши мумкин.
Расмий чипта сотуви манбаларини аниқлаш ва турли ноқонуний ҳолатлардан сақланиш учун футбол ишқибозларини эҳтиёткорликка чақирамиз. Фақат расмий чипталар орқали ўйинни бемалол томоша қилиш имкониятига эга бўласиз.
