Велоспорт бўйича Ўзбекистон миллий паралимпия терма жамоаси аъзоси Фотима Саиповага Чирчиқ шаҳри «Ифтихор» маҳалласидан янги икки хонали уйнинг калитлари топширилди, деб хабар берди ЎзА.
Уй-жой Президент Шавкат Мирзиёев топшириғига биноан ажратилган. Спортчига калитларни Тошкент вилояти ҳокими Зойир Мирзаев топширди.
2025 йил 30 июнь куни Ёшлар куни муносабати билан ўтказилган тадбирда Президент Шавкат Мирзиёев Фотима Саиповани шахсан табриклаб, эришган ютуқлари ва мамлакатнинг халқаро нуфузини янада оширишга қўшган муносиб ҳиссаси учун «Келажак бунёдкори» медали билан тақдирлаган эди.
«Президент билан учрашиш мен учун шараф, — деб ўз таассуротлари билан ўртоқлашди Саипова. — Тантанали маросимда исмим ва фамилиям айтилганда, кўзимга ёш келди. Ота-онамни эсладим. Бугун вилоят ҳокими қўлидан янги уйимнинг калитларини олдим. Буларнинг бари худди тушга ўхшайди».
2025 йил февраль ойида Таиландда бўлиб ўтган паравелоспорт бўйича Осиё чемпионатида Фотима Саипова (T1) олтин медални қўлга киритган эди. Ўшанда Ўзбекистон терма жамоаси жами 26 та медални қўлга киритиб, умумжамоа ҳисобида ғалаба қозонган эди. Миллий паравелосипедчилар жамоаси Осиё чемпионатида иккинчи йил кетма-кет етакчилик қилмоқда.
