Финляндия президенти Александр Стубб 30−31 октябрь кунлари Ўзбекистонга расмий ташриф билан келади. Бу ҳақда унинг матбуот хизмати хабар берди.
2025 йил 31 октябрь куни Александр Стубб Ўзбекистон президенти Шавкат Мирзиёев билан учрашиши кутилмоқда. Музокараларнинг асосий мавзулари «Финляндия ва Ўзбекистон ўртасидаги икки томонлама муносабатлар, геосиёсат ва унинг Европа ва Марказий Осиё учун минтақавий оқибатлари» бўлиши айтилган.
Бундан ташқари, Финляндия президенти матбуот хизматининг қайд этишича, «Россиянинг Украинадаги ноқонуний тажовузи» ва «кўп томонлама тизимни қўллаб-қувватлашдаги ҳамкорлик» билан боғлиқ масалалар ҳам кўриб чиқилади.
Бундан аввал, 2025 йил 28−29 октябрь кунлари у Қозоғистонга ташриф буюради. Бу ҳақдаги хабарда ҳам музокараларнинг шу каби мавзулари кўрсатилган.
Александр Стубб бизнес-семинарда иштирок этади, Жаҳон иқтисодиёти ва дипломатия университетида маъруза ўқийди ҳамда ташқи сиёсат бўйича экспертлар билан учрашади.
Финляндия президентига парламент депутати ва Ўзбекистон билан дўстлик бўйича парламент гуруҳи раиси Вилле Скиннари, шунингдек, Финляндия савдо ва саноат доиралари вакиллари ҳамроҳлик қилади.
Финляндиянинг собиқ президенти Мауно Койвисто 1992 йилда Ўзбекистонга расмий ташриф билан келган.
2025 йил сентябрь ойи бошида Ўзбекистон ва Финляндия президентлари телефон орқали мулоқот ўтказиб, бўлажак ташрифни муҳокама қилган эди.
Ўзбекистон томони маълумотларига кўра, 2024 йилда икки мамлакат ўртасидаги ўзаро савдо ҳажми 24 фоизга ошган.
Шавкат Мирзиёев ва Александр Стубб 2024 йил ноябрда Бокуда бўлиб ўтган БМТнинг иқлим конференцияси (СОР29) доирасида учрашган эди.
