Ўзбекистон президенти Шавкат Мирзиёев 2025 йил 9 сентябрь куни Финляндия президенти Александр Стубб билан телефон орқали мулоқот қилди.
Муҳокаманинг асосий мавзуси Финляндия раҳбарининг Ўзбекистонга бўлажак ташрифи бўлди. Ташриф санаси аниқлаштирилмади.
Томонлар кўп қиррали ҳамкорликни кенгайтириш йўлларини, биринчи навбатда, савдо-иқтисодий ва гуманитар соҳаларда кўриб чиқдилар.
Ўзбекистон президенти матбуот хизмати маълумотларига кўра, 2024 йилда ўзаро товар айирбошлаш ҳажми 24%га ошган. 2022 йилдан буён мамлакатда Финляндиянинг «Nordic» университети фаолият юритмоқда, мактаб таълимида қўшма лойиҳалар амалга оширилмоқда.
Шавкат Мирзиёев ва Александр Стубб қишлоқ хўжалиги, кимё, энергетика, тоғ-кон саноати, телекоммуникация ва бошқа инновацион соҳалардаги ҳамкорликни муҳокама қилдилар. Шунингдек, таълим тизимига илғор технологияларни жорий этиш муҳимлиги таъкидланди.
Аниқ қўшма лойиҳаларни тайёрлаш учун Идоралараро комиссия йиғилишини ўтказиш ва икки давлатнинг етакчи компаниялари иштирокида Ўзбекистон — Финляндия бизнес-форумини ташкил этиш таклиф этилди.
Мулоқот чоғида суҳбатдошлар долзарб халқаро масалалар юзасидан ҳам фикр алмашдилар, низоларни халқаро ҳуқуқ нормалари асосида тинч йўл билан ҳал этиш муҳимлигини таъкидладилар.
