Фарғона вилоятида Ўзбекистон чегараси орқали йирик миқдордаги гиёҳвандлик воситаларини олиб киришга бўлган уриниш тўхтатиб қолинди, деб хабар берди Божхона қўмитаси матбуот хизмати.
«Равот» постида божхона ходимлари ва чегарачилар Тожикистондан кириб келган Lacetti автомобилини тўхтатган. Машина техник назорат воситалари ёрдамида кўздан кечирилган.
Натижада ёнилғи баки ичига яширилган ўрамлар аниқланган. Бак холислар иштирокида очилганда, божхоначилар 6945 дона Royal кучли таъсир қилувчи дори воситасини топишган.
Шунингдек, уч турдаги гиёҳвандлик моддалари: 10,7 кг гашиш, 412 гр марихуана ва 35 гр афюн — жами 11,2 кг мусодара қилинган. Барча моддалар далилий ашё сифатида олинган.
Тергов давомида аниқланишича, ҳайдовчи 2000 доллар эвазига тақиқланган моддаларни чегарадан ўтказиб, уйи яқинидаги боғга кўмиб қўйишни режалаштирган. Шундан сўнг уларни буюртмачи — Тожикистон фуқароси олиб кетиши керак бўлган.
Мазкур ҳолат юзасидан Жиноят кодексининг 246-моддаси (Контрабанда) билан жиноят иши қўзғатилган. Тергов ҳаракатлари олиб борилмоқда.
Божхона хизмати эслатишича, 2025 йилда божхона постлари орқали 1,8 тоннадан ортиқ гиёҳвандлик воситалари, жумладан синтетик моддаларнинг айланишига чек қўйилган. Бу 2024 йилга нисбатан 1,8 баравар кўп дегани.
