2026 йил 27–31 март кунлари Ўзбекистонда FIFA Series халқаро ўртоқлик ўйинлари бўлиб ўтади ва унда Ўзбекистон миллий терма жамоаси Габон ҳамда Венесуэладан келган рақибларга қарши майдонга тушади.
Турнир олдидан терма жамоа бош мураббийи Фабио Каннаваро матбуот анжуманида жамоанинг ҳолати, жароҳатланган футболчилар билан боғлиқ вазият ва мамлакатдаги вазият кескинлашгунига қадар Эронда тўп сурган футболчилар тақдири ҳақида батафсил сўзлаб берди. Мутахассис, шунингдек, 11 июндан 19 июлга қадар АҚШ, Мексика ва Канадада бўлиб ўтадиган жаҳон чемпионати вақтида нима учун Американинг Атланта шаҳри база сифатида танланганига изоҳ берди. Шу билан бирга, мураббий бўлажак ўйинлардан кутилаётган натижалар билан ўртоқлашди.
ЖЧга тайёргарлик олдидан рақиб сифатида Габон ва Венесуэла ҳақида
«Биз доимо кучли терма жамоаларга қарши ўйнашга ҳаракат қиламиз. Африкадан худди шундай сифатга эга рақиб топиш биз учун осон бўлмади. Жаҳон чемпионатида биз Африка, Жанубий Америка ва Европа жамоалари билан ўйнашимиз керак бўлади. ФИФА бизга шундай имкониятни тақдим этди ва биз ҳар қандай рақиб билан ўйнашдан хурсандмиз», — деди Фабио Каннаваро.
Унинг маълум қилишича, терма жамоа жаҳон чемпионати олдидан бошқа ўртоқлик учрашувларини ҳам ўтказишни режалаштирмоқда — биттаси Канадада, шунингдек, Атлантага йўл олишдан олдин АҚШда.
«Биз турли мамлакатларнинг турли даражадаги жамоалари билан ўйнашни хоҳлаймиз. Чунки жаҳон чемпионатида даража мутлақо бошқача бўлади. Португалия ва Колумбия — турнирнинг энг кучли жамоаларидан бўлиб, улар ФИФА рейтингининг топ-20 талигига киради. Тез орада охирги рақибимизни ҳам билиб оламиз. Агар, масалан, Конго ҳақида гапирадиган бўлсак, уларнинг кўплаб футболчилари Премьер-лигада ўйнашади. Шунинг учун биз тайёр бўлишимиз керак, чунки бу осон бўлмайди. Агар кимдир жаҳон чемпионатида осон бўлади деб ўйласа — у адашади», — дея таъкидлади мутахассис.
«Мен ўз жамоам ҳақида ўйлайман»
Габоннинг асосий юлдузлари йўқлиги Ўзбекистон терма жамоасига ёрдам берадими, деган саволга Каннаваро асосий эътиборни ўзига қаратиш кераклигини айтди.
«Мен ўз жамоамни тайёрлаяпман ва рақиб ҳақида ўйлаётганим йўқ. Биз уларнинг қандай ўйнашини ўргандик, охирги ўйинларини кўриб чиқдик. Албатта, Обамеянг — энг яхши ҳужумчилардан бири, лекин биз ўзимиз ҳақимизда ўйлашимиз керак. Биз ўз ўйинимизни яхшилашимиз, қаерда қўшишимиз кераклигини тушунишимиз ва бор эътиборимизни ўйинларга қаратишимиз лозим», — деди.
«Баъзан рақиб кучли, баъзан эса йўқ, лекин бунинг аҳамияти йўқ. Футболчилар 100 фоиз тайёр бўлишлари керак. Мен ушбу икки ўйинда ҳаммага ўзини кўрсатиш имкониятини беришга ҳаракат қиламан. Бундай ўйинларда футболчиларни кўздан кечириш ва уларни тушуниш муҳим, умид қиламанки, вазият бунга имкон беради», — дея қўшимча қилди терма жамоа бош мураббийи.
«Баъзан топ-даражадаги бўлмаган футболчилар билан учрашганда, жамоа 100 фоиз ғалаба қозонамиз деб ўйлаб, диққатни тўлиқ жамлай олмаслиги мумкин. Аммо футбол — бу шунчаки исмлар эмас. Футбол — бу майдондаги ўйин. Бу ўртоқлик ўйинлари бўлса ҳам, биз бор кучимизни кўрсатишга ва ғалаба қозонишга ҳаракат қиламиз. Биз футболчиларни синаб кўрмоқчимиз, кўпроқ нарсани тушунмоқчимиз. Биз жаҳон чемпионати яқин эканлигини ва ҳар бир ўйин ўрганиш ҳамда бир вақтнинг ўзида натижага эришиш учун имконият эканини англашимиз керак», — деб таъкидлади.
«Жароҳатланган футболчилар ЖЧга бора олишига ишонч йўқ»
Сўнгги ойлар давомида бош мураббий жароҳатланган футболчиларни кузатиб борди.
«Мен улар операция қилинган Римда бўлдим. Мен ҳамма билан гаплашишим ва ҳар бир кишида умид қолдиришим керак, чунки бу терма жамоа — биз эшикларни ёпиб қўя олмаймиз. Биз Аббосни [Файзуллаев] йўқотдик, мен келганимдан бери у доимо жароҳатланган. Шу каби муаммолари бор яна икки-учта футболчи мавжуд ва биз ечим топиш учун кўпроқ ишлашимиз керак. Тўғрисини айтсам, улар жаҳон чемпионатида ўйнай олишадими-йўқми, билмайман. Биз улар турнирнинг бир қисми бўлишлари учун қўлимиздан келган барча ишни қиляпмиз. Охирги сониягача улар рўйхатда бўлишади, кейин эса кўрамиз. Ҳамма, мутлақо ҳамма», — деди мутахассис.
55 нафар футболчидан иборат рўйхат
Бугунги кунда терма жамоага чақирилиши мумкин бўлган футболчиларнинг кенгайтирилган рўйхати 55 нафар ўйинчини ташкил этади.
«Албатта, ҳар қандай нарса содир бўлиши мумкин ва биз ҳамма нарсага тайёр бўлишимиз керак. Лекин агар кимдир мавсум давомида ўзини яхши кўрсатаётганини кўрсам, рўйхатни кенгайтиришимиз мумкин — бу муаммо эмас», — деди Фабио Каннаваро.
«Мен ўзим ишонганларни чақираман. Рўйхатдан ташқарида бўлганлар эса, мен учун танлов қийинчилигини туғдирадиган ва уларни чақиришга мажбур қиладиган даражада ўзларини кўрсатишлари керак», — дея таъкидлади бош мураббий.
«Менда чақиришим мумкин бўлган футболчилар кўп, чунки Дубайдаги йиғинларда биз кўплаб яхши футболчиларни кўрдик. Ва мен бундан хурсандман, чунки вазият шундай бўлганда, бу мен учун танлов қийинчилигини юзага келтиради. 55 нафар футболчидан иборат рўйхатда ёшлар ҳам, тажрибалилар ҳам бор — айнан мана шу менга керак. Мен исмларни айтмайман, чунки бу нотўғри, лекин кўплаб яхши футболчиларни кўрдим. Дубайда улар билан танишганимдан, уларни тушунганимдан, улар билан гаплашганимдан жуда хурсанд бўлдим», — деди.
«Энг муҳими — ҳамма терма жамоага чақирилганидан фахрланарди. Бу энг муҳим нарса. Агар футболчилар буни ҳис қилмаса, демак бу ёмон. Шунинг учун мен ҳаммани кузатишга ва биз бирга бўлмаган пайтимизда ҳам улар билан мулоқот қилишга ҳаракат қиламан. Биз уларга қўнғироқ қиламиз, алоқада бўлиб турамиз, чунки улар биз кузатиб бораётганимизни ҳис қилишлари муҳим», — деб таъкидлади мутахассис.
Дарвозабонлар ўртасидаги юқори рақобат ҳақида
Дарвозабонларга келсак, шу вақтгача терма жамоа беш нафар дарвозабонни чақирган.
«Уларнинг ҳар бири ўйнаш учун етарлича юқори даражага эга. Мен учун бу рақобат нуқтаи назаридан муҳим. Биз ҳаммани бир хил машқ қилдирамиз — 23 нафар майдон ўйинчиси ва дарвозабонлар, рақобат яратиш учун ҳамма бир хил шароитда ишлайди. Умид қиламанки, ушбу турнирда ҳам уларга ўйин вақти бера оламан, чунки бизнинг дарвозабонларимиз профессионал, улар кўп ишлашмоқда. Лекин ким ўйнашини билмайман — таркиб бўйича қарорни ўйин куни эрталаб қабул қиламан, доим шундай қиламан», — деди Фабио Каннаваро.
Эрон чемпионатида тўп сурган футболчилар билан боғлиқ вазият ҳақида
Терма жамоа бош мураббийи Яқин Шарқда вазият кескинлашган пайтда футболчилар Эронда бўлгани ва зудлик билан кетишга мажбур бўлганларини айтиб берди.
«Уруш кетаётган мамлакатда бўлиш жуда даҳшатли. Биз уларга ёрдам беришга ҳаракат қиляпмиз: уларни жисмоний тайёргарлик бўйича мураббий билан базамизда машқ қилдиряпмиз, ФИФА билан уларга лигамизда ўйнаш имкониятини бериш масаласини муҳокама қилдик. Умид қиламанки, ушбу турнирдан кейин ФИФА бирон бир қарор қабул қилади, чунки фақат машқ қилиш ва ўйинларда қатнашмаслик — бу яхши эмас», — деди у.
Мутахассис федерациядан ҳафта давомида улар учун ўртоқлик ўйинлари ташкил этишни сўраганини маълум қилди. «Биз ечимлар қидиряпмиз, лекин бу осон эмас, чунки улар расмий ўйинларда қатнаша олмайдилар», — деди.
Миллий чемпионат футболчиларининг жисмоний ҳолати ҳақида
«Агар футболчилар Европада ўйнашса, демак улар яхши даражада. Бизнинг лигамизнинг муаммоси шундаки, ўйинлар интенсивлиги доим ҳам юқори эмас. Маҳаллий футболчиларнинг жисмоний ҳолати баъзан кўнгилдагидек бўлмайди», — деди Фабио Каннаваро.
«Мен тушунаман, охирги ойларда Рамазон бўлди, ўйинлар кўп эди ва ўйин даражаси юқори бўлмади. Мен футболчиларни доимо олдинга ундайман, чунки агар улар бошқалар билан бир хил даражада бўлишни хоҳлашса, 100 фоиздан кўпроғига жавоб беришлари керак», — деб таъкидлади.
«Тўғрисини айтсам, бу мени жуда қаттиқ ташвишга соляпти. Жисмоний тайёргарлик — бу биз энг кўп ишлашимиз керак бўлган жиҳат. Турнир олдидан бизда атиги икки-уч ҳафта бўлади ва тайёргарлик учун вақт деярли қолмайди. Шунинг учун мен ҳали январь ойидаёқ бу жиҳатни яхшилашимиз кераклигини айтгандим. Футболчиларнинг жисмоний ҳолати учун қайғуряпман», — деди мураббий.
Турнир даврида база сифатида Атлантанинг танланиши ҳақида
«Биз Атлантани танладик, чунки ФИФА бизга маълум шартларни — меҳмонхоналар ва инфратузилмани таклиф қилди. Мен шахсан у ерларни бориб кўрдим. Биз бу қарорни биринчи ўйинни Мехикода, иккинчисини Хюстонда, учинчисини эса Атлантада ўйнашимиз сабабли ҳам қабул қилдик ва умид қиламанки, агар кейинги босқичга ўтсак, яна Атлантада бўлишимиз эҳтимоли бор», — деди Фабио Каннаваро.
«Бундан ташқари, Атлантадаги машғулот базаси мен АҚШда кўрганларим ичида энг яхшиларидан бири. Меҳмонхона ҳам мос келади — у ерда футболчилар тикланиши учун барча шароитлар мавжуд», — деди.