Тошкент метрополитени йўловчиларнинг метродаги димлик ҳақидаги янги танқидларига муносабат билдирди. Ижтимоий тармоқларда тарқалган видеода вагонларда совутиш тизимини нега ёқиш мумкин эмаслиги сўралган.
Метрополитен матбуот хизматининг маълум қилишича, видеода сўз бораётган поезд таркиби кўп йиллардан буён фойдаланиб келинаётган эски турдаги ва кондиционер тизими билан жиҳозланмаган поездлар сирасига киради. Ушбу таркиб «бошидан ушбу тизимсиз ишлаб чиқарилган ва техник жиҳатдан қўшимча жиҳозланиши мумкин эмас».
Метрополитеннинг хабар беришича, айни пайтда вагон парки 50% дан ортиқроққа янгиланган — сўнгги 5 йилда мавжуд 36 та поездга қўшимча равишда 41 та янги таркиб харид қилинган. 2026 йил охиригача яна 14 та 4 вагонли поезд таркибини етказиб бериш режалаштирилган.