Футбол бўйича Ўзбекистон ёшлар терма жамоаси 23 ёшгача бўлган футболчилар ўртасидаги Осиё кубоги гуруҳ босқичининг иккинчи турида Эрон билан дуранг ўйнади. Саудия Арабистонида 2026 йил 10 январь куни бўлиб ўтган «C» гуруҳидаги учрашув 0:0 ҳисобида якунланди.
Ўйин шиддатли ва голларсиз ўтди. Дарвоза томон берилган зарбалар бўйича жамоалар тенг кўрсаткич қайд этди — 7:7, бироқ Ўзбекистон аниқ зарбалар борасида рақибидан устун келди (3 га қарши 1). Эрон вақтнинг катта қисмида тўпга эгалик қилди (61% га қарши 39%).
Ўзбекистон терма жамоаси тўпни олиб қўйишда кескинроқ ҳаракат қилди: ўзбекистонликлар 23 та фол ишлатиб, 2 та сариқ карточка олди, эронликлар эса огоҳлантиришсиз атиги 4 марта қоида бузди.
Биринчи бўлимда жамоалар фаол тарзда вазиятлар алмашишди: эронликлардан Муҳаммад Ҳоссейннажад жарима зарбасидан хавфли зарба йўллади, ўзбекистонликлардан эса Нурлан Ибраимовда гол уриш имконияти бўлди, аммо ҳар икки вазиятда дарвозабонлар ишончли ҳаракат қилишди.
18-дақиқада Эроннинг тезкор қарши ҳужуми хавфли вазиятни юзага келтирди — Ризо Гандипур тезлигидан фойдаланиб, ҳимоячидан қочиб кетди ва тўпни югуриб келаётган Меҳди Жаъфарийга етказиб берди, бироқ у дарвозадан бироз четга зарба берди.
Учрашувнинг иккинчи ярмида Ўзбекистон терма жамоаси гол уришга яқин келди, аммо Равшан Хайруллаевнинг ҳаволатиб берган зарбаси тўсиннинг бироз юқорисидан ўтиб кетди.
Ҳар икки томондан амалга оширилган бир қатор алмаштиришларга қарамай, ҳисоб очилмади.
Дуранг натижа Ўзбекистон терма жамоасига икки турдан сўнг тўрт очко жамғариш имконини берди — аввалроқ Ливанни (4:2) мағлуб этган Корея Республикаси U-23 ҳам шунча очкога эга ва тўплар нисбатидаги фарқ эвазига биринчи ўринни эгаллаб турибди. Эрон икки очко билан гуруҳда учинчи ўринда.
Гуруҳ босқичининг сўнгги турида Ўзбекистон Корея Республикаси билан ўйнайди, Эрон эса Ливан U-23 билан тўқнаш келади. Иккала ўйин ҳам 2026 йил 13 январь куни бўлиб ўтади (терма жамоа ўйини соат 16:30 да бошланади). Чорак финалга тўртта гуруҳдан иккитадан энг яхши жамоа йўл олади.
Турнирда 16 та терма жамоа иштирок этмоқда, 2003 йил 1 январда ва ундан кейин туғилган футболчилар ўйнаш ҳуқуқига эга. U-23 Осиё кубогининг жорий мавсуми олимпия бўлмаган охирги турнир бўлади — кейинги циклдан бошлаб турнир 4 йилда бир марта ўтказилади. 2024 йилги турнир финалида Ўзбекистонни мағлуб этган Япония U-23 амалдаги чемпион ҳисобланади.