Фарғона вилояти Бувайда тумани «Қорақум» маҳалласи фуқароси, 1895 йил 1 январда туғилган Ҳувайдо Умарованинг (Тошматова) туғилганлиги факти расман тасдиқланди. Бу ҳақда Адлия вазирлиги хабар берди. Бу ҳолат суднинг унинг уйида ўтказилган сайёр мажлисида аниқланди.
«Энди Ҳувайдо Умарова момо расман Ўзбекистондаги энг кекса аёл ҳисобланади», — дейилади хабарда.
Туман адлия бўлими ходимлари уйларни айланиш жараёнида Ҳувайдо Умарованинг туғилиши рўйхатдан ўтмаганини тасдиқлади. Туман адлия бўлими судга мурожаат қилди. Фуқаролик ишлари бўйича Қўқон туманлараро суди даъво аризасини қаноатлантирди.
Оммавий ахборот воситалари Ҳувайдо Умарова ҳақида бир неча бор ёзган. 2016 йилда у «Шуҳрат» медали ва бошқа мукофотлар билан тақдирланган. 2023 йилда ЎзА ўша пайтда 128 ёшли аёлнинг референдумда овоз беришда иштирок этгани ҳақида хабар берган эди.
Ҳувайдо Умарованинг қариндошлари уни сайёрадаги энг кекса фуқаро сифатида Гиннеснинг рекордлар китобига киритиш учун ариза топширишни режалаштиргани маълум. Бироқ, унинг 1999 йилда берилган амалдаги паспортида туғилган санаси бўлмаган.
Адлия вазирлиги ўз хабарида энди бундай тан олиш мумкинлигини қайд этади. «Воқеалар ривожини кузатиб борамиз», — дейилади хабарда.