Ўзбекистон энг янги C-390 Millennium ҳарбий-транспорт самолётларини сотиб олмоқда, деб эълон қилди Бразилиянинг Embraer компанияси Сингапурдаги авиасалонда. Мамлакат Мудофаа вазирлиги Ҳарбий-ҳаво кучлари Марказий Осиёда ушбу турдаги самолётларнинг илк операторига айланади.
C-390 асосан транспорт ва гуманитар миссияларда қўлланилади, бу эса ҲҲК имкониятларини сезиларли даражада кенгайтиради, дейилади хабарда.
C-390 Millennium – ўз классидаги энг замонавий ҳарбий-транспорт самолёти бўлиб, у бошқа ўрта ҳажмли ҳарбий-транспорт самолётларига нисбатан кўпроқ юк (26 тонна) ташиш қобилиятига, юқори тезлик (470 узел) ва парвоз масофасига эга.
У кенг кўламли миссияларни, жумладан, юк ва қўшинларни ташиш, техника ва шахсий таркибни десант қилиш, тиббий эвакуация, қидирув-қутқарув операциялари, ёнғинларни ўчириш ва гуманитар операцияларни бажариши мумкин. Самолёт вақтинчалик ва тупроқли учиш-қўниш йўлакларидан ҳавога кўтарилиш ва уларга қўниш имкониятига эга.
Ҳавода ёнилғи қуйиш учун тез ўрнатиладиган ускуналар билан жиҳозланган ва KC-390 деб белгиланувчи самолёт ҳам ёнилғи қуювчи, ҳам ёнилғи қабул қилувчи сифатида ишлатилиши мумкин.
«Millennium НАТО тизимлари билан тўлиқ мос келади ва айниқса мослашувчан жанговар қўллаш (Agile Combat Employment, ACE) операциялари учун жуда мос келади», — деб қайд этилган хабарда.
C-390 Millennium самолёти Бразилия, Португалия, Венгрия, Корея Республикаси, Нидерландия, Австрия, Чехия, Швеция, Словакия ва Литва ҳарбий-ҳаво кучлари томонидан танланган.
Ўзбекистон ҲҲК ҳозирда Ил-76 ва CASA C-295 ҳарбий-транспорт самолётларидан фойдаланмоқда.