Ўзбекистон Бош прокуратураси «Тошкент шаҳар электр тармоқлари» корхонаси тизимида тизимли муаммоларни аниқлади, дея хабар бермоқда ЎзА.
2025 йил 24−25 июль кунлари пойтахтнинг турли туманларида электр тармоқларида авариялар ва кучланиш пасайиши кузатилди. Идора хабарига кўра, узилишлар бўйича мутахассислар жалб этилган ҳолда текширув ўтказилган.
Бош прокуратура маълумотларига кўра, бугунги кунда пойтахтда 823 мингдан ортиқ электр энергияси истеъмолчиси рўйхатга олинган, бу 2024 йилга нисбатан 47,6 мингтага ва жорий йил бошига нисбатан 21 мингтага кўп. Истеъмол ҳам ўсмоқда: агар 2022 йилда 7,6 млрд кВт·соат бўлган бўлса, 2023 йилда — 8,3 млрд кВт·соат, 2024 йилда эса — аллақачон 8,7 млрд кВт·соатни ташкил этган. Ўртача йиллик ўсиш — 621,3 млн кВт·соат, ёки 9% дан ортиқ.
1154 call-марказига юзлаб фуқаролар мурожаат қилмоқда, лекин операторлар сони атиги 5 кишини ташкил этади, шу сабабли навбат 60-70 та қўнғироққача етган. Текширувдан сўнг штатга қўшимча 10 та оператор киритишга қарор қилинди.
Аҳолини узилишлар ва авариялар ҳақида хабардор қилиш тизими қониқарсиз деб топилди: 23 июль куни 64 та авария ҳақида истеъмолчиларга хабар берилмаган, 112 та ҳолатда эса хабарлар кечикиб етиб келган. Эндиликда хабарлар ҳокимликлар сайтлари ва оммабоп интернет-каналларда тезкорлик билан эълон қилинади, дейилади хабарда.
Тезкор чора кўриш мақсадида ҳар бир туман авария хизматига прокуратура ходимлари бириктирилди, диспетчерлик хизматларининг шайлиги кучайтирилди.
«Тошкент шаҳар электр тармоқлари» раҳбари, 11 та туман энергия корхонаси раҳбари, 13 та бош муҳандис, 3 та диспетчер, жами 28 нафар мансабдор шахс интизомий жавобгарликка тортилди.
Бош прокуратура текшируви «Тошкент шаҳар электр тармоқлари» компанияси фаолиятида тизимли муаммоларни аниқлади.
Хусусан, мавжуд 78 та авария бригадаси ва 34 та техника бирлиги носозликларни тез бартараф этиш учун етарли эмас. Яна 35 та штат бирлиги зарур.
Охирги 3 йилда иш ҳақи камлиги ва юқори иш юкламаси туфайли ходимларнинг 30%и корхонани тарк этган, шу жумладан эксплуатация хизматларининг 228 нафар мутахассиси (45%).
9749 км тармоқдан тахминан 2540 км (26%) капитал таъмирга муҳтож. 90 та подстанциядан 9 таси модернизация қилиниши керак, яна 2 тасининг қувватини ошириш зарур.
11 та лаборатория автомобилидан 6 таси замонавий талабларга жавоб бермайди, улардан фақат 2 таси тунда ишлайди. Бу носозликларни, айниқса бир вақтнинг ўзида бир неча туманда авариялар юз берганда, тез аниқлаш ва бартараф этишга имкон бермайди.
Тизимни барқарорлигини ошириш учун 26 та қўшимча штат бирлигини (13 та муҳандис-лаборант ва 13 та ҳайдовчи-лаборант) жорий этиш, шунингдек, 10 та янги лаборатория автомобили сотиб олиш талаб этилади, ҳар бирининг нархи тахминан 1 млрд сўмни ташкил этади.
Эслатиб ўтамиз, 2025 йил 24 июль куни Тошкентда Чилонзор, Яккасарой, Миробод ва Яшнобод туманларида электр таъминотига мажбурий чекловлар киритилган эди. Туман электр тармоқлари корхонаси буни трансформаторларнинг ҳаддан ташқари юкланишининг олдини олиш билан изоҳлаган. Пойтахтдан кейин Тошкент вилоятида ҳам магистрал тармоқларга юкламанинг чегаравий қийматлардан ошиши фонида профилактик электр узилишлари жорий этилди.
Аввалроқ, Энергетика вазирлиги ёзги электр энергияси истеъмоли ва жазирама даврида тармоққа тушадиган юклама қишдаги кўрсаткичлардан ошиб кетганини маълум қилган эди.
Электр таъминотига чекловлар Тошкентда бир йил олдин ҳам тахминан шу вақтда ва худди шу сабаб — юқори ҳарорат туфайли рекорд даражадаги истеъмол туфайли жорий этилган эди.
