Тошкент халқаро аэропортининг келиш залида E-Gate автоматлаштирилган паспорт назорати тизими ишга туширилди. Бу ҳақда Uzbekistan Airports компанияси хабар берди.
Янги ҳудуд Ўзбекистон фуқаролари учун мўлжалланган саккизта электрон коридор билан жиҳозланган.
Назоратдан ўтиш учун йўловчи биометрик паспортни ўқувчи қурилмага қўйиши ва юзни таниш жараёнидан ўтиши кифоя. Шахс тасдиқлангандан сўнг, турникет автоматик равишда очилади. Бутун жараён тахминан 15−20 сония вақтни олади, дейилади хабарда.
E-Gate тизими Тошкент аэропортида илк бор 2023 йилда — халқаро терминалнинг жўнаш залида ўрнатилган эди. Янги зонанинг ишга туширилишини ҳисобга олган ҳолда, автоматлаштирилган ўтказиш линияларининг умумий сони 20 тага етди.
«E-Gate технологиясини жорий этиш паспорт назоратидан ўтиш вақтини сезиларли даражада қисқартириш, назорат пунктларининг ўтказиш қобилиятини ошириш ва йўловчилар учун қўшимча қулайлик яратиш имконини беради», — дейилади компания баёнотида.
Ўзбекистонда E-Gate тизими жорий этилган биринчи аэропорт Самарқанд аэропорти бўлган эди. У ерда тизим 2022 йил март ойида пайдо бўлган.
2025 йил октябрь ойи охирида Тошкент аэропортининг халқаро терминалида янгиланган келиш зали очилган эди. Реконструкциядан сўнг унинг майдони 2200 кв. м га кенгайди, очиқ терраса пайдо бўлди ва VIP-зал кенгайтирилди. Кутиб олувчилар учун ҳудуд энди тахминан 200 та кутиш ўриндиғини ўз ичига олади (бундан олдин — 120 та).
