Ўзбекистонда «Док-1 Макс» сиропи бўйича жиноят иши доирасида олиб қўйилган 3,2 млн донадан ортиқ дори воситаси Тошкентда назорат органлари вакиллари иштирокида йўқ қилинади. Бу ҳақда Мажбурий ижро бюросининг (МИБ) пойтахт бош бошқармаси хабар берди.
Утилизация судланган С. К. (Фармацевтика тармоғини ривожлантириш агентлигининг собиқ директори) ва бошқа шахсларга нисбатан жиноий иш бўйича Тошкент шаҳар судининг ижро варақаси асосида ўтказилмоқда.
Суд қарори билан «Quramax Medical» МЧЖ (препаратлар импортчиси) омборлари ва божхона терминалларида сақланаётган дори воситаларини йўқ қилиш белгиланган.
Йўқ қилиниши лозим бўлган препаратлар орасида тергов маълумотларига кўра, 2022-2023 йилларда Ўзбекистонда камида 68 нафар боланинг ўлими ва яна 16 нафар боланинг ногирон бўлишига сабаб бўлган «Док-1 Макс» сиропи ҳам бор. 2025 йилнинг июль ойида сиропни истеъмол қилганидан кейин ногирон бўлиб қолган яна бир бола вафот этди.
Жами қуйидаги дори воситалари утилизация қилинади:
- 811 478 таблетка «Док-1 Макс»;
- 101 669 шиша «Док-1 Макс» сиропи;
- 2 252 796 таблетка «Амбронол»;
- 56 672 шиша «Амбронол» сиропи.
Йўқ қилиш жараёни ҳуқуқни муҳофаза қилиш органлари, санитария-эпидемиология хизмати, Экология ва атроф-муҳитни муҳофаза қилиш қўмитаси вакиллари ҳамда гувоҳлар иштирокида ўтказилмоқда.
Препаратлар атроф-муҳитга салбий таъсир кўрсатмайдиган махсус печда ёқиб юборилади, дея маълум қилди МИБ.
Товон пуллари ҳали ҳам тўланмаган
Таъкидлаш жоизки, «Док-1 Макс» иши бўйича 2024 йил 26 февралда чиқарилган суднинг биринчи ҳукми ҳам маънавий зарарни қоплаш қисмида ҳали ижро этилмаган. Ҳукмга кўра, судланувчилардан жами 68 нафар ҳалок бўлган ва 18 нафар ногирон бўлиб қолган болалар фойдасига жами 75,6 млрд сўм ундирилиши керак.
Апелляция шикоятлари кўриб чиқилиб, биринчи инстанция судининг ҳукми ўз кучида қолдирилганидан сўнг, Сардор Кариевнинг онаси 2,5 млрд сўм тўлади, бу пуллар жабрланувчилар ўртасида тақсимланди (ҳар бир оила 20-30 млн сўмдан олди). Ҳукм чиқарилишидан аввал у ўғлига нисбатан жазони юмшатиш эвазига бутун зарарни — 75,6 млрд сўмни тўлашга тайёрлигини айтган эди.
2024 йил кузида ногиронлиги бор болаларнинг ота-оналари уларнинг аҳволи ёмонлашаётгани, ҳеч ким уларга етарлича эътибор бермаётганини айтиб, товон пулларини тўлашни тезлаштиришни сўраган эди. Ўшанда Соғлиқни сақлаш вазири Асилбек Худаяров жабрланган болалар назорат остида эканини таъкидлаган, аммо ота-оналар уни ёлғон маълумот беришда айблаган.