АҚШнинг собиқ президенти, 82 ёшли Жо Байденга суякларига метастаза берган простата саратони ташхиси қўйилди, деб хабар беради New York Times собиқ давлат раҳбари офиси баёнотига таяниб.
Ташхис жума куни, 2025 йил 16 майда, шифокорлар Байденни сийиш билан боғлиқ муаммолар туфайли текширгандан сўнг ва простатада «кичик тугун» топгандан сўнг қўйилди. Байден офиси баёнотида айтилишича, ўсимта Глисон шкаласи бўйича 10 баллдан 9 балл олган. Бу саратоннинг энг агрессив шакли бўлиб, саратон ҳужайралари тез тарқалиши мумкин, деб қайд этади NYT.
«Гарчи бу касалликнинг янада агрессив шаклини англатса-да, саратон гормонларга сезгир кўринади, бу уни самарали даволашга имкон беради, — дейилади Байден офиси баёнотида. — Президент ва унинг оиласи шифокорлар билан биргаликда даволаш вариантларини ўрганмоқда». АҚШнинг амалдаги президенти Дональд Трамп, Байденни бир неча бор танқид қилган бўлса-да, унга тезроқ тузалиб кетишини тилади.
«Мелания иккимиз Джо Байденнинг яқиндаги тиббий ташхиси ҳақидаги хабардан қайғудамиз. Биз Джилл ва унинг оиласига энг самимий ва энг яхши тилакларимизни етказамиз, Джога эса тез ва муваффақиятли тузалиб кетишини тилаймиз», — деб ёзди у TruthSocial ижтимоий тармоғида.
Собиқ вице-президент Камала Харрис ўзи ва эри собиқ президентнинг ташхиси ҳақидаги хабардан «қайғуда» эканлигини билдирди. «Жо — курашчи, ва мен ишонаманки, у бу синовга ҳаёти ва етакчилик услубини доимо белгилаб келган куч, чидамлилик ва оптимизм билан дуч келади», — деб ёзди у Х ижтимоий тармоғида.
Байден ва унинг оиласига қўллаб-қувватлаш сўзларини собиқ президент Барак Обама ва унинг рафиқаси Мишель, АҚШнинг собиқ давлат котиби Хиллари Клинтон ва бошқа сиёсатчилар, жумладан, The Hill қайд этганидек, нафақат Байденнинг Демократик партиядаги иттифоқчилари, балки Республикачилар партиясидан унинг фаол танқидчилари ҳам билдирди.
Байден 2025 йил январда Оқ уйни тарк этди ва АҚШ тарихидаги энг кекса президентга айланди. У бир партиядошларининг саломатлиги ва ёшига оид хавотирлар туфайли 2024 йилги президентлик сайловларида иштирок этишдан воз кечишга мажбур бўлган эди. Демократлар номзоди сифатида Байденни Харрис алмаштирди. У республикачилардан номзод бўлган Трампга ютқазди.
