Самарқанд вилоятининг Қўшработ ва Каттақўрғон туманлари ҳокимликлари ходимлари Хитойга хизмат сафарига ўз қариндошларини ва сафар мақсадларига алоқаси бўлмаган ходимларни юборишган, деб хабар берди Ўзбекистон Коррупцияга қарши курашиш агентлиги матбуот хизмати.
Идора маълумотларига кўра, Марказий Осиё мамлакатлари профессионал фермерлари учун ташкил этилган семинарда Қўшработ туманидан ҳокимнинг ҳайдовчиси М. Т. ва ҳокимнинг ўғли Д. Д. иштирок этган.
Бундан ташқари, Хитойда қишлоқ хўжалигини ривожлантириш ва маҳсулотларни қайта ишлаш бўйича ўқув курсларига Қўшработ тумани ҳокимлигининг тегишли соҳага алоқадор вакиллари ҳамда фермер хўжаликлари раҳбарлари таклиф этилган. Сафар учун 32 кишидан иборат делегация рўйхати тақдим этилган.
«Бироқ, рўйхатни ўрганиш давомида делегациянинг айрим аъзолари, хусусан, туман ҳокимининг рафиқаси М. Ш., шунингдек, ҳокимликнинг бошқа бир мансабдор шахсининг яқин қариндоши Ч. Х. рўйхатга асоссиз равишда киритилгани аниқланди. Бундан ташқари, рўйхатда Қўшработ туманидаги 1-сонли техникум ходимлари сифатида кўрсатилган Н. Х. ва М. С. исмли шахслар аслида ушбу техникумда ишламаслиги маълум бўлди», — деб қайд этди агентлик.
Каттақўрғон тумани маъмурияти 2025 йилнинг 22 майидан 30 майигача инвестиция лойиҳаларини амалга ошириш ва савдо шартномалари бўйича янги келишувларга эришиш мақсадида Хитойга хизмат сафарини ташкил этган. Делегация таркибига ҳокимликнинг сафар мақсадларига бевосита алоқаси бўлмаган ходими киритилган.
Kun.uz нашри аввалроқ Каттақўрғон тумани ҳокимлиги томонидан 2025 йил 15 августдаги Хитой сафари якунлари бўйича эълон қилинган фотосуратларда туман ҳокими Жамшид Насриддиновнинг вояга етмаган ўғли ҳам акс этгани ҳақида хабар берган эди. Бироқ агентлик баёнотида бу факт тилга олинмаган.
Антикоррупция агентлиги президентнинг 2021 йил 16 июндаги фармони талаблари, яъни мансабдор шахсларнинг хорижий хизмат сафарлари ҳақидаги маълумотларни очиқ эълон қилиш тартиби бузилганини таъкидлади.
«Каттақўрғон ва Қўшработ туманлари ҳокимликлари ушбу маълумотларни асоссиз равишда яшириб келишган. Ўрганиш ва таҳлиллар давомида тўпланган материаллар қонуний чора кўриш учун ҳуқуқни муҳофаза қилиш органларига юборилди», — дейилади агентлик хабарида.
Аввалроқ, 2025 йилда Санкт-Петербург шаҳрида ўтказилган «Алые паруса» битирувчилар байрамига Самарқанд вилояти мансабдор шахслари ўз фарзандлари, жиянлари ва яқин қариндошларини юборгани хабар қилинган эди.
Текширув якунларига кўра, улардан 28 млн сўм ундирилган, тадбирга ўз фарзанди ва жиянини юборган Самарқанд вилояти мактабгача ва мактаб таълими бошқармаси бошлиғи Музаффар Ҳамдамов эса лавозимидан озод этилган эди. Бошқарманинг яна 5 нафар ходимига нисбатан интизомий жазо чоралари қўлланилиши мумкин.