Олий Мажлис томонидан 4 йилдан кўпроқ вақт олдин маъқулланган «Давлат тили тўғрисида»ги қонуннинг янги таҳрири президент томонидан такомиллаштириш учун парламентга қайтарилди. Бу ҳақда 2026 йил 16 январь куни бўлиб ўтган матбуот анжуманида «Миллий тикланиш» партияси раиси Алишер Қодиров маълум қилди.
2021 йил июнь ойида Сенат давлат тили ҳақидаги янги қонунни маъқуллаган эди. Ҳужжатда давлат органлари ва ташкилотлари фаолиятида, жисмоний ва юридик шахсларнинг мурожаатларида, иш юритишда, тадбирларда, норматив-ҳуқуқий ҳужжатларда давлат тилидан фойдаланиш масалалари батафсил белгилаб берилган эди.
Қодировнинг маълум қилишича, давлат раҳбари қайтариш ҳуқуқидан фойдаланиб, ҳужжатни такомиллаштириш учун парламентга қайта юборган.
Унинг сўзларига кўра, Шавкат Мирзиёев қонунни такомиллаштириш бўйича «жуда тўғри таклифлар» киритган ва партия уларни асосли деб ҳисоблаган. У илгари «Миллий тикланиш» партияси ҳужжатга киритишга муваффақ бўлмаган бир қатор нормалар партия фикрича зарур бўлганини қайд этди.
«Глобал чақириқлар ва қадриятларнинг аҳамияти ортиб бораётган даврда давлат раҳбарининг „Давлат тили тўғрисида“ги қонунни замонавий талаб ва чақириқларга мувофиқлаштиришни талаб қилаётгани бизни жуда қувонтирди», — деб таъкидлади.
Қонун қачон қабул қилиниши ҳақидаги саволга жавоб берар экан, «Миллий тикланиш» раҳбари ҳозирги вақтда устида иш давом этаётганини айтди.
«Аниқ муддатларни айта олмайман, лекин ишлаяпмиз. Бу қонун бугун Ўзбекистон учун жуда зарур ва бир қатор масалалар бўйича ечимларга эҳтиёж аллақачон пишиб етилган», — деди.
Партия раҳбари, шунингдек, давлат тили ривожини фақат қонунчилик чоралари билан таъминлаб бўлмаслигини таъкидлади. Унинг фикрича, жамиятдаги муносабатнинг ўзгариши ва тилнинг тўлақонли ривожланиши учун шароит яратилиши асосий омил бўлиб қолмоқда:
«Ҳатто қонун ўзгартирилса ҳам, фақатгина тузатишлар билан бу мақсадларга эришиб бўлмайди».
Қодиров жамиятнинг давлат тилига бўлган муносабати аста-секин ўзгараётганини қўшимча қилди: унга бўлган эътибор ва ҳурмат ортмоқда, махсус комиссия иш бошлади, бир қатор ташаббуслар амалга оширилмоқда.
Шу билан бирга, у давлат тилини ривожлантириш бошқа тилларни камситишга қаратилмаганини таъкидлади. Унинг сўзларига кўра, Ўзбекистонда яшовчи барча халқлар мулоқот тилини эркин танлаш ҳуқуқига эга — бу Конституцияда мустаҳкамланган.
«Ўзбекистонда ҳеч ким тил ёки миллий мансублиги бўйича камситилмайди, барча миллатлар қўллаб-қувватланади. Аммо кун сайин давлат тили қандай бўлиши кераклиги ва қонун ижроси қандай таъминланиши кераклиги бўйича янги талаблар ва янги қарашлар шаклланмоқда. Ўйлайманки, қонун такомиллаштирилган ҳолда ва биз кутган даражада қабул қилинади», — деди партия раиси.