Ўзбекистон Олий суди раиси Бахтиёр Исломов 2026 йил 30 март куни идора олдида суд қарорига норозилик сифатида дарахтга чиқиб олган эркакни қабул қилди. Бу ҳақда 1 апрель куни Олий суд матбуот котиби Азиз Обидов хабар берди. У ушбу воқеа 30 март куни юз берганини таъкидлади.
Кундузи ижтимоий тармоқларда Тошкент фуқароси шу йўл билан Олий суд раҳбарияти қабулига киришга ҳаракат қилгани ҳақида хабарлар тарқалди. Фотосуратда эркакнинг қўлида плакат борлигини (ёзувни илғаш қийин) кўриш мумкин. Унинг ёнига шлем ва зирҳли нимча кийган икки нафар формали шахс йўл олмоқда.
Олий суд хабарида қайд этилишича, 47 ёшли А. Ч. дарахтдан туширилган, шундан сўнг уни Бахтиёр Исломов тинглаган. Шикоят расмийлаштирилган бўлиб, у белгиланган тартибда кўриб чиқилади.
Азиз Обидовнинг маълумотларига кўра, А. Ч. жиноят ишлари бўйича Чилонзор тумани судининг 2020 йил 5 октябрдаги қарори билан Жиноят кодексининг 184-моддаси 3-қисми (жуда кўп миқдорда солиқлар ёки йиғимларни тўлашдан бўйин товлаш) бўйича Жиноят-процессуал кодексининг 83-моддаси 2-банди (реабилитация учун асослар) асосида оқланган. Шу билан бирга, у Жиноят кодексининг 167-моддаси 3-қисми «а» банди (жуда кўп миқдорда ўзлаштириш ёки растрата қилиш йўли билан талон-торож қилиш) бўйича 7 йилга озодликдан маҳрум этилган.
Юқори турувчи судлар суд ҳукмини ўзгаришсиз қолдирган.
Олий суд раиси А. Ч.ни 2025 йил 29 ноябрь куни қабул қилган эди. Ўшанда унга нисбатан чиқарилган суд қарорларини ўзгартириш учун асослар етарли эмаслиги тушунтирилган, дейилади хабарда.
«Ностандарт ҳаракатларга қўл уриш шарт эмас»
Азиз Обидов ўз хабарида фуқароларнинг суд ҳимоясидан фойдаланиш ҳуқуқлари қонун билан кафолатланганини ва улар Олий судга белгиланган процессуал тартибда «эркин ва чекловларсиз мурожаат қилишлари мумкинлигини таъкидлади. Ностандарт ёки хавфли ҳаракатларга қўл уриш шарт эмас».
«Ушбу вазиятдан келиб чиқиб, шуни таъкидлаймизки, Олий судга мурожаат қилиш учун дарахтга чиқиш каби ҳаракат талаб этилмайди ва бундай усуллар масалани ҳал қилишга хизмат қилмайди. Аксинча, мурожаатлар қонунчилик ҳужжатларида белгиланган тартиб ва шакллар орқали амалга оширилиши лозим», — деб қайд этди матбуот котиби.
«Фуқароларга ҳуқуқий маданиятни ошириш, мурожаат қилишнинг қонуний механизмларидан тўғри фойдаланиш ва ўз ҳуқуқларини қонуний усуллар билан ҳимоя қилиш тавсия этилади», — дея хулоса қилди.