2025 йил март ойида Хитойда илк бор аниқланган коронавируснинг янги NB.1.81 штамми Осиё мамлакатлари ва АҚШга тарқалди, деб ёзади New York Post.
Хитой ва Гонконгда касалхонага ётқизилганлар сони ошгани кузатилмоқда, айниқса кексалар орасида. АҚШда, касалликларни назорат қилиш ва олдини олиш марказлари маълумотларига кўра, инфекция ҳолатлари 2025 йил март-апрель ойларида Калифорния, Вашингтон, Виржиния ва Нью-Йоркка келган сайёҳлар орасида биринчи марта аниқланган.
Мутахассисларнинг таъкидлашича, вирус бошқа штаммларга қараганда тезроқ тарқалмоқда ва Хитой ҳамда қатор Осиё мамлакатларида устунлик қилмоқда. Ҳозирча АҚШда тарқалишни баҳолаш учун маълумотлар етарли эмас, аммо кузатув давом этмоқда.
Ўзбекистондаги вазият
Коронавируснинг янги штамми тарқалишини Ўзбекистон Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Отабеков изоҳлади.
СЭС раҳбарининг биринчи ўринбосари Ўзбекистондаги эпидемиологик вазиятни барқарор деб атади.
«Ҳа, мамлакатда ҳали ҳам COVID-19 касаллигининг якка ҳолатлари аниқланмоқда. Бироқ, фақатгина сурункали ёндош касалликлари бор беморлар госпитализация қилинмоқда. Қолганлар амбулатор шароитда даволанмоқда, чунки касаллик енгил шаклда ўтмоқда», — деди Нурмат Отабеков.
Экспертнинг ишонч билдиришича, мамлакатда бу касалликни ташхис қўйиш ва даволаш имконияти мавжуд.
«Жамиятда аллақачон коллектив иммунитет шаклланган. Бундай вазият нафақат Ўзбекистонда, балки бутун дунёда кузатилмоқда. „Янги вируслар пайдо бўлиши“ ҳақидаги хабарларга келсак, бугунги кунга келиб дунёда коронавируснинг 45 мингга яқин мутацияси қайд этилган ва бу жараён давом этмоқда. Бироқ, улардан фақат 10-15 тасигина касалликни ҳақиқатан ҳам келтириб чиқарган. Шунинг учун мутациялар туфайли ваҳимага тушмаслик керак», — дея таъкидлади Нурмат Отабеков.
Коронавируснинг янги тўлқини ҳақида
СЭС раҳбарининг биринчи ўринбосари «COVID-19нинг янги тўлқини дунёни қамраб олмоқда» деган хабарларни асоссиз деб ҳисоблайди.
Далил сифатида, Жаҳон соғлиқни сақлаш ташкилоти 2024 йил 13 апрелдан бошлаб коронавирусга чалиниш ҳолатлари бўйича кунлик маълумотларни эълон қилишни тўхтатган.
«Бунинг ўзиёқ дунёдаги эпидемиологик вазиятнинг барқарорлигидан далолат беради. Бундан ташқари, ЖССТ SARS-CoV-2 NB.1.81 штаммининг кенг кўламда тарқалишини расман тасдиқламаган. Дунёда коронавирус ҳақида шов-шувли хабарларни тарқатишдан манфаатдор гуруҳлар борлиги сир эмас. Шунинг учун сўнгги кунларда эълон қилинаётган бундай маълумотларни танқидий қабул қилиш керак. Янги тўлқиннинг пайдо бўлиш эҳтимоли деярли нолга тенг», — деди қўмита раисининг биринчи ўринбосари.
У Ўзбекистонда айланаётган вирусларни мониторинг қилиш тизими мавжудлигини ва беморлардан олинган вирус намуналари лабораторияларда мунтазам равишда текширилиб, таҳлил қилинишини эслатди.
