Американинг Oppenheimer компанияси Citibank билан ҳамкорликда Centrum Air авиакомпанияси, My Freighter юк авиакомпанияси ва Centrum Logistics логистика компаниясини ўз ичига олган Centrum Holding компаниясининг IPO жараёнида андеррайтер сифатида иштирок этади. Бу ҳақда Oppenheimer бошқарувчи директори Жон Тонелли 2026 йил 18 февраль куни Вашингтонда президент Шавкат Мирзиёевнинг Америка бизнеси ва молиявий институтлари вакиллари билан учрашувида маълум қилди.
IPO (акцияларни бирламчи оммавий жойлаштириш) — бу хусусий компания акцияларини кенг доирадаги шахсларга (биржада) биринчи марта сотиш тартибидир. IPO натижасида компания оммавийга айланади ва ривожланиш учун узоқ муддатли капитал жалб қилади, инвесторлар эса қимматли қоғозларни дастлабки босқичда сотиб олиш имкониятига эга бўладилар.
Андеррайтер — бу IPO ўтказишга ёрдам берадиган молиявий компания (одатда йирик банк ёки инвестиция банки). У компанияни баҳолайди (унинг қиймати қанчалигини аниқлайди), акциялар нархини белгилашга ёрдам беради, харидорларни қидиради ва биржада жойлаштиришни ташкил қилади.
Тонеллининг сўзларига кўра, авиация, автомобиль ва темир йўл ташувларини, шунингдек, юк, логистика ва йўловчи ташиш фаолиятини бирлаштирган компаниянинг стратегияси Ўзбекистонни минтақавий логистика хабига айлантиришга қаратилган.
«Ушбу кенг кўламли режаларни амалга ошириш учун, шубҳасиз, катта маблағ талаб этилади. Шу муносабат билан Oppenheimer компанияси Citibank билан биргаликда IPO доирасида акцияларни жойлаштириш жараёнида андеррайтер сифатида қатнашади. Биз компанияни 2 миллиард доллар даражасида баҳолашни режалаштирмоқдамиз. Бу Centrum Air’ни Марказий Осиёдаги энг қиммат компаниялардан бирига айлантиради», — деди у «Ўзбекистон 24» телеканали сюжетида.
Кейинчалик компания вакиллари аниқлик киритишича, гап фақат битта авиакомпания эмас, балки Centrum Holding ҳақида бормоқда.
Тонеллининг орқа фонидаги тақдимотга кўра, IPO’да 600 миллион доллар жалб қилиш, яъни акцияларнинг тахминан 30 фоизини жойлаштириш режалаштирилган (бутун компания 2 миллиард долларга баҳоланганда).
У шунингдек, Андижон вилоятидаги молиялаштириш лойиҳаларини ўз ичига олган янги ташаббуслар устида иш олиб борилаётганини маълум қилди. Вилоят ҳокимлиги сентябрь ойида Oppenheimer умумий қиймати 1,2 миллиард доллар бўлган учта йирик лойиҳани молиялаштиришда иштирок этиш ниятида эканини қайд этган эди.
Хусусан, қиймати 180 миллион долларлик тўқимачилик саноат зонасини ташкил этиш, Хонабодда 20 миллион доллар эвазига сунъий кўл қуриш, шунингдек, қиймати 1 миллиард доллар бўлган «Янги Андижон» йирик шаҳарсолик лойиҳасини амалга ошириш муҳокама қилинган.
«Бундан ташқари, биз бир қатор янги ташаббуслар устида ишлаяпмиз. Хусусан, раҳбари ушбу тадбирда иштирок этаётган Андижон вилоятини молиялаштириш лойиҳалари бўйича жараёнлар давом этмоқда», — деди Тонелли.
Шунингдек, йирик халқаро инвесторлардан бири Ўзбекистондаги иштирокини кенгайтиришни режалаштирмоқда:
«Қайд этиш жоизки, йирик халқаро инвесторларимиздан бири — Европа ва Лотин Америкасида фаолият юритувчи банк — Тошкентда ўз бош офисини жойлаштирган ҳолда минтақавий ваколатхонасини очишни режалаштирмоқда».
Акцияларни жойлаштириш
Аввалроқ Centrum Holding 2026 йил якунига қадар оммавий бозорларга чиқишни режалаштираётгани ҳақида хабар берилган эди. Компанияда таъкидланишича, акцияларни жойлаштиришдан кўзланган асосий вазифалардан бири — флотни кенгайтириш, янги йўналишларни йўлга қўйиш, техник базани мустаҳкамлаш ва инфратузилмани ривожлантириш ҳисобига барқарор ўсиш учун инвестицияларни жалб қилишдир.
Ҳозирда Centrum Air флоти 15 та Airbus авиалайнеридан иборат. 2025 йил охирида компания битта тор фюзеляжли A320 ва битта кенг фюзеляжли A330 самолётини, шунингдек, февраль ойида яна биттасини қабул қилиб олди.
«2026–27 йиллар истиқболида флотни 25 та ва ундан кўп самолётгача кўпайтириш режалаштирилган ва бу фақат йўловчи ташувчи кемалар. Бундан ташқари, биз юк флоти ва ер усти транспорт воситалари паркини кўпайтириш устида ҳам ишлаяпмиз», — деб хабар берди компания.
My Freighter компанияси 2019 йил охирида ташкил этилган. Устав капитали 6,42 миллиард сўм бўлган компания муассислари сифатида Ҳафизжон Ғафуров ва Абдулазиз Абдураҳмонов кўрсатилган. 2023 йилда йўловчи ташувчи «шўъба» корхона — Centrum Air ташкил этилган.