Ўзбекистоннинг хусусий Centrum Air авиакомпанияси Яқин Шарқ мамлакатлари узра ҳаво ҳудуди ёпилгани сабабли у ердан учиб кета олмаган 1279 нафар Европа давлатлари фуқароларини Таиланд ва Мальдив оролларидан олиб чиқди. Рейслар Тошкентда оралиқ тўхташ билан амалга оширилди.
2026 йил 6 мартдан бошлаб Пхукет, Бангкок ва Маледан Франкфурт-Майнга (Германия) тўртта рейс ташкил этилди, яна учтаси режалаштирилган. Умумий ҳисобда еттита рейс билан 2234 нафар йўловчини олиб чиқиш кўзда тутилган, деб хабар берди Centrum Air матбуот хизмати.
Рейсларни ташкил этиш бўйича авиакомпанияга Германиянинг туристик компаниялари мурожаат қилган, деб қайд этди матбуот хизмати. Кўпроқ йўловчиларни ташиш учун 347 ва 358 ўринли Airbus A330 самолётлари танланган.
Компания ушбу рейсларнинг бажарилиши мунтазам йўналишлар бўйича парвозлар жадвалига таъсир қилмаганини таъкидлади.
Ўзбекистон раҳбариятининг топшириғи билан ташкил этилган репатриация дастури доирасида Centrum Air самолётларида Яқин Шарқ мамлакатларидан 11 067 нафар фуқаро ватанига қайтарилди.
Хусусан, Жидда ва Мадинадан (Саудия Арабистони) умра зиёратчиларини қайтариш учун 2 мартдан 10 мартгача 32 та рейс амалга оширилди ва 9714 нафар йўловчи ташилди. Рейслар ҳам Тошкентга, ҳам бошқа шаҳарларга бажарилди.
Дубайдан (БАА) 4 та рейс орқали 956 нафар йўловчи қайтарилди. Яна 397 киши Доҳадан (Қатар) Ар-Риёд (Саудия Арабистони) орқали 2 та рейс билан олиб келинди.
Аввалроқ Ўзбекистон ТИВ АҚШ ва Исроилнинг Эронга қарши ҳарбий ҳаракатлари бошланганидан сўнг Форс кўрфази минтақасидан жами 25 минг нафардан ортиқ фуқаро қайтарилгани ҳақида хабар берилган эди.
2026 йил 10 мартдан бошлаб Ўзбекистон авиация ҳукумати Саудия Арабистони ва БААга йўловчи ташиш бўйича чекловларни бекор қилди.