Халқаро тез овқатланиш тармоғи Burger King’нинг Ўзбекистондаги илк ресторани 2025 йил охиригача очилиши мумкин. Бу ҳақда салқин ичимликлар ишлаб чиқарувчи International Beverages Tashkent компанияси асосчиси Шуҳрат Эргашев «Ўзбекистон 24» телеканалига берган интервьюсида маълум қилди.
Унинг сўзларига кўра, халқаро брендларнинг Ўзбекистонга кириб келиши мамлакатга бўлган ишончни оширади.
«Яқинда бу ҳақда гапирган эдим – биз Burger King компаниясини олиб киряпмиз. Бу компаниянинг Ўзбекистонга бўлган ишончи ифодаси. Кўпгина хорижий компаниялар мамлакатга киришдан олдин: бу ерда McDonald’s, Burger King ёки бошқа брендлар борми, йўқми, деб қарайдилар», – деди тадбиркор.
Унинг маълум қилишича, биринчи ресторан яқин ойларда Тошкентда очилади.
«Бу жуда катта глобал конгломерат ва биз уни Ўзбекистонга олиб келдик. Яқин вақт ичида – бир-бир ярим ойдан кейин – улар иш бошлайдилар ва йилдан-йилга бутун мамлакат бўйлаб бундай ресторанларни очамиз», – дея қўшимча қилди Эргашев.
2021 йил июль ойида Burger King Ўзбекистон бозорига киришни режалаштираётгани маълум бўлган эди. Burger King Uzbekistan франшизаси тармоқнинг Москвадаги Россия офиси билан боғлиқ компанияга тегишли эди.
2025 йилнинг март ойида халқаро Revery инвестиция компанияси «Верный Капитал» компаниялар гуруҳидан Burger King Kazakhstan франшизасини сотиб олгани маълум бўлди. Келишув Revery ва минтақанинг таниқли тадбиркорлари, Pepsi Uzbekistan асосчиларининг қўшма корхонаси – Holten Group орқали амалга оширилган. Holten Group Pepsi Uzbekistan, шунингдек, Ўзбекистондаги Baraka озиқ-овқат дўконлари тармоғига эгалик қилади ва уларни бошқаради.
2025 йил сентябрь ойида Spot нашри ўз манбасига таяниб, ресторанларнинг очилиши тахминан жорий йилнинг ноябрь-декабрь ойларига режалаштирилгани, бироқ давом этаётган қурилиш ишлари туфайли аниқ сана ҳали белгиланмагани ҳақида ёзган эди. Тошкентда 3 та нуқта очилиши режалаштирилган: Tashkent City Mall савдо мажмуасида, Seoul Mun ҳудудида ва «Беруний» метро бекати ёнида.
