Ўзбекистон Республикаси Президенти Шавкат Мирзиёев ўз фармони билан Тошкентдаги “Бўрижар” каналига тушиб кетган қизларни қутқариш чоғида 2025 йил 5 май куни вафот этган Абдуманноп Самиқовни вафотидан сўнг «Жасорат» медали билан тақдирлади. Бу ҳақда давлат раҳбарининг матбуот котиби Шерзод Асадов хабар берди.
«Абдуманноп Самиқов бошқаларга ёрдам беришга доимо тайёр турган меҳрибон инсон сифатида танилган эди. Давлатимиз раҳбари ушбу воқеани алоҳида ҳамдардлик билан қабул қилиб, марҳумнинг турмуш ўртоғи ва фарзандларига чуқур ҳамдардлик билдирди», — дейилади хабарда.
«Бўрижар» спорт мажмуаси ходими Нурмуҳаммад Мамасалиев ҳам «Жасорат» медали билан тақдирланди.
«Бу воқеа жамиятимизда инсон қадр-қиммати қанчалик қадрланишининг ёрқин намунаси бўлди. Кучли ва жипслашган жамиятда жасорат ва эзгулик эътиборсиз қолмайди», — деди президент матбуот котиби.
Қизларни қутқаришда маҳаллий аҳоли вакиллари Дарья Грапиненкова ва Александра Махсудова ҳамда Абдуманноп Самиқовнинг ўгай ўғли Саидакбар Абдувалиев ҳам иштирок этган эди.
