Ўзбекистон ҳукумати тадбиркорлик соҳасини тартибга солувчи қонунчиликдаги 1600 дан ортиқ мажбурий талабларни бекор қилди. Бу Вазирлар Маҳкамасининг 2025 йил 15 декабрдаги 67 саҳифали қарорида кўзда тутилган. Адлия вазирлигининг қайд этишича, чекловларнинг бу қадар кенг кўламли бекор қилиниши илк бор амалга оширилмоқда.
Ҳужжатга мувофиқ, ветеринария хизмати назоратида бўлган 1568 та товар позицияси бўйича мувофиқлик сертификатларини олиш талаби бекор қилинмоқда.
Шунингдек, туристик хизматлар кўрсатишдаги айрим ортиқча талаблар ҳамда тегишли фаолият турларига, жумладан, якка тартибдаги тадбиркорларга хос бўлмаган чекловлар бекор қилинмоқда.
Бундан ташқари, якка тартибдаги тадбиркорлар томонидан импорт қилишда товарлар қиймати бўйича ўрнатилган 5000 долларлик чеклов олиб ташланди. Туристларга 30 кунгача бўлган муддатга уй-жой ижарага беришга оид талаблар ҳамда ёғочдан мебель ишлаб чиқариш билан боғлиқ айрим нормалар бекор қилинди.
Қабул қилинган ўзгаришлар бизнеснинг давлат органлари билан ўзаро ҳамкорлигидаги бюрократик тўсиқларни камайтиришга ҳамда вақт ва ресурсларни тежаш ҳисобига тадбиркорлар харажатларининг қисқаришига хизмат қилиши кутилмоқда.
Бугунги кунда тадбиркорлик соҳасидаги мажбурий талабларнинг ягона электрон реестрига 36 мингдан ортиқ талаб киритилган. Адлия вазирлиги ортиқча чекловларни янада қисқартириш мақсадида норматив ҳужжатларни қайта кўриб чиқиш ишларини давом эттираётганини маълум қилди.
Эслатиб ўтамиз, 2024 йилдан бошлаб тадбиркорлик субъектларидан талаб қилинадиган, давлат органлари бошқа идоралардан олиши мумкин бўлган 8 турдаги ўзаро дубликат ҳисоботлар ва статистик маълумотлар бекор қилинган эди. Шунингдек, 2024 йил 1 мартдан 22 турдаги лицензия ва рухсатнома ҳужжатлари бекор қилинган эди. Жумладан, 7 турдаги рухсатнома тўлиқ бекор қилинган, яна 12 таси бирлаштириш йўли билан бекор қилинган, 3 таси эса хабардор қилиш тартиби билан алмаштирилган.
2025 йил август ойида тадбиркорлар билан ўтказилган учрашувда президент мажбурий сертификатланиши лозим бўлган товарлар рўйхати 459 та позициягача қисқартирилганини ва яна 288 тага қисқартирилишини маълум қилган эди. Санитария, ветеринария ва карантин назорати остидаги кўчатлар, минерал ўғитлар, пойабзал, чорва озуқалари каби 32 тоифадаги товарлар учун мувофиқлик сертификатлари бекор қилинади.
Бундан ташқари, сертификатлаштириш тартиби ҳам соддалаштирилмоқда: эндиликда мувофиқлик сертификатлари ҳар бир партия учун эмас, балки шартномада кўрсатилган ҳажм учун берилади.
