«Ўзбекнефтгаз» давлат нефть-газ компанияси ҳар куни биржа савдоларига чиқариладиган автобензин ҳажмини оширади. Бу ҳақда компания матбуот котиби Мўмин Ибодов маълум қилди.
Унинг сўзларига кўра, ушбу чора ҳаво ҳароратининг пасайиши сабабли автомобилларга газ тўлдириш компрессор станциялари (АГТКС) фаолиятига киритилган чекловлар фонида қабул қилинган.
Биржага чиқариладиган бензиннинг кунлик ҳажми, илгари ўртача 3700 тоннани ташкил этган бўлса, талаб ва таклифдан келиб чиқиб 5000 тоннагача оширилиши мумкин.
Энергетика вазирлиги хабар беришича, ёнилғи етказиб бериш барқарорлигини таъминлаш учун барча ҳудудларда олдиндан зарур захиралар шакллантирилган. Автобензинга бўлган талабни тўлиқ қондириш масаласи давлат назоратида, барча зарур чоралар кўрилган, дейилади хабарда.
«Шу муносабат билан хусусий ёнилғи қуйиш шохобчалари эгаларидан нархларни сунъий равишда оширишга йўл қўймаслик, шунингдек, тегишли сифатдаги автобензинни тўлиқ ҳажмда сотишни таъминлаш сўралади. Назорат тадбирлари кучайтирилади, нархларнинг асоссиз оширилишига йўл қўйилмайди», — деди матбуот котиби.
Шу билан бирга, Бухоро нефтни қайта ишлаш заводи томонидан биржа савдоларига чиқарилган автобензин ҳажми бўйича маълумотлар эълон қилинди. Хусусан, 2026 йил 19 январь куни биржага 3920 тонна автобензин жойлаштирилди, шундан 190 тоннаси Аи-91 ва 3730 тоннаси Аи-92 маркаси.
Савдолар якунига кўра харидорлар томонидан 3426 тонна ёнилғи сотиб олинган бўлиб, шундан 3236 тоннаси Аи-92 бензинига тўғри келган. Компания биржа савдоларига чиқариладиган автобензин ҳажми талаб ва таклифни инобатга олган ҳолда қўшимча равишда оширилиши мумкинлигини таъкидлади.
2025 йил октябрь ойи охирида энергетика вазири Жўрабек Мирзамаҳмудов Ўзбекистоннинг куз-қиш мавсумига тайёргарлиги ҳақида гапирган эди. Унинг сўзларига кўра, тизим туну кун ишлаш режимига ўтказилган, тармоқлар модернизация қилинган, газ етказиб бериш рақамлаштирилмоқда, ёнилғи захираси яратилмоқда, кам таъминланган оилаларга эса бир марталик ёрдам ажратилади.
Ўшанда Энергетика вазирлиги раҳбари 995 минг тонна автомобиль бензини етказиб бериш режалаштирилганини маълум қилган эди. Талаб кескин ошган тақдирда фойдаланиш учун қўшимча равишда 65 минг тонна бензин захираси яратилган.
Божхона қўмитаси маълумотларига кўра, 2025 йил давомида нефть маҳсулотлари импорти 1,59 млрд долларга етган (2024 йилга нисбатан +6,7%), ушбу ҳажмдан дизель ёнилғисига 563,6 млн доллар (+70,7%), бензинга эса 492,6 млн доллар (+9,5%) тўғри келади.
Дизель импорти жисмоний ҳажмда 85,2 фоизга — 441 минг тоннадан 761,3 минг тоннагача, бензин импорти эса 775,9 млн литрдан 818,3 млн литргача (+5,6%) ошган.