Ўзбекистон қонунчилигига биноларнинг ташқи деворларида тез ёнувчан материаллардан фойдаланишни тақиқловчи қатъий талаблар киритилиши керак. Бу 2025 йил 1 декабрь куни Президент Шавкат Мирзиёев раислигида ўтказилган йиғилишда муҳокама қилинди.
Давлат раҳбари мамлакатдаги 44 мингдан ортиқ кўп қаватли биноларнинг ёнғин хавфсизлиги ҳолатини тўлиқ ўрганиш зарурлигини, фавқулодда вазиятларга жавоб бериш тизими эҳтимолий хавфларга тайёр бўлиши кераклигини таъкидлади, дейилади Президент матбуот хизмати хабарида.
У кўп қаватли уйлардаги қурилиш нормалари ва ёнғин хавфсизлиги қоидаларини халқаро амалиётга мувофиқлаштириш ҳамда мансабдор шахсларнинг жавобгарлигини кучайтириш бўйича қонун лойиҳасини ишлаб чиқишни топширди.
Шунингдек, коммунал хизматлар ишини мувофиқлаштириш ва фавқулодда вазиятларда тезкор жавоб бериш тизимини такомиллаштириш масалалари муҳокама қилинди.
Президент республика бўйлаб туманлар кесимида ишчи гуруҳларни шакллантириш, барча коммунал хизматлар ва бошқарув сервис компанияларини Фавқулодда вазиятлар вазирлиги (ФВВ) диспетчерлик тизимига интеграция қилиш ҳамда уй-жойларни профилактика қилиш ишларини кучайтиришни топширди.
Шу кунларда Гонконгдаги «Ван Фук Корт» турар-жой мажмуасида содир бўлган йирик ёнғин оқибатида 150 дан ортиқ одам ҳалок бўлди. Ўнлаб кишилар жабрланди. Қурбонлар сони якуний бўлмаслиги мумкин.
2015 йил сентябрь ойида Тошкент марказида пайвандлаш ишлари вақтида 12 қаватли бинонинг фасад қопламаси ёниб кетган эди, жабрланганлар бўлмаган.
2024 йил сентябрь ойида пойтахт чеккасидаги Ўрмон хўжалиги агентлиги ва Тошкент давлат аграр университети биноларида кучли ёнғин содир бўлган эди.