Тошкент вилояти Бекобод туманида 2025 йил 11 декабрь куни (тахминан ярим тунда) ИИБ ходими Nexia 3 автомобилида пиёдани уриб юборди, натижада эркак киши ҳалок бўлди. Бу маълумотни Ўзбекистон Бош прокуратураси «Газета»га тасдиқлади.
Йўл-транспорт ҳодисаси «Қорасув — Бўка — Бекобод» автомобиль йўлининг 64-километрида, «Қорақўйли» маҳалласи ҳудудида содир бўлган. Ҳалок бўлган шахс 43 ёшда бўлган.
2025 йил 12 декабрь куни туман прокуратураси томонидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш, одам ўлимига сабаб бўлиши) ва 117-моддаси 2-қисми (хавфли ҳолатда қолдириш, одам ўлимига сабаб бўлиши) билан жиноят иши қўзғатилди. Гумонланувчи қамоққа олинган.
Шу билан бирга, ҳалок бўлган шахснинг жасади ҳалигача топилмаган. Бош прокуратура қидирув ишлари давом этаётганини қайд этди.
Kun.uz нашри суд ажримига таяниб ёзишича, 36 ёшли ИИБ ходими — катта тезкор ходим — маст ҳолатда бўлган. У уриб юборилган шахсга ёрдам кўрсатиш ўрнига, уни машинага юклаган ва далалардан бирига ҳайдаб кетган. Сўнг у хотинини чақирган, аёл Matiz автомобилида етиб келган.
Улар биргаликда жабрланувчини аёлнинг машинасига юклашган, ЙТҲ содир бўлган жойдан 35 км узоқликдаги Фарҳод каналига бориб, жасадни (йўлда эркак вафот этган) сувга ташлаб юборишган.
«Газета» ҳозирча ушбу маълумотни расмий органлардан тасдиқлашга муваффақ бўлмади.