Ўзбекистон Ички ишлар вазирлигининг собиқ юқори лавозимли раҳбарлари жиноят иши доирасида қўлга олинди.
Улар — ички ишлар вазирининг собиқ ўринбосари, Жамоат хавфсизлиги департаменти бошлиғи генерал-майор Бекмурод Абдуллаев ва Жазони ижро этиш департаментининг собиқ бошлиғи Рустам Турсунов. Эҳтиёт чораси сифатида улар қамоққа олинган.
Жиноят иши қўзғатилгани ва эҳтимолий айбловлар юзасидан расмий изоҳ берилмади. ИИВ ва Бош прокуратура сўровларга жавоб қайтармади.
«Дарё» ўз манбаларига таяниб ёзишича, ИИВнинг икки департаменти собиқ раҳбарлари давлат мулкини талон-торож қилиш, мансаб ваколатини суиистеъмол қилиш ва бошқа жиноятлар бўйича очилган иш доирасида тергов қилинаётган бўлиши мумкин. Гап хорижий маҳсулотлар ва ускуналар, масалан, светофорлар ўрнига маҳаллий маҳсулотларни етказиб бериш схемалари натижасида 100 млрд сўмдан ортиқ зарар етказилгани ҳақида кетаётган бўлиши мумкин.
Бекмурод Абдуллаев 2021 йил апрель ойидан буён ички ишлар вазири ўринбосари — Жамоат хавфсизлиги департаменти бошлиғи лавозимида ишлаб келган. Рустам Турсунов Жазони ижро этиш департаментига 2021 йил февраль ойидан раҳбарлик қилган. Уларнинг иккаласи ҳам президент Шавкат Мирзиёевнинг 2025 йил 3 ноябрдаги қарор ва фармойиши билан лавозимидан озод этилган эди.