Икки карра Олимпиада чемпиони, ўзбекистонлик боксчи Баҳодир Жалолов 2025 йил 6 февраль куни Канада, Монреаль шаҳрида франциялик Дэвид Спилмонтга қарши ўтказилиши режалаштирилган профессионал жанги бекор қилинганини маълум қилди. Бу унинг 2024 йил Париждаги Олимпиадада иккинчи олтин медални қўлга киритганидан кейинги илк профессионал жанги бўлиши керак эди.
Жанг Монреалдаги бокс кечасида бўлиб ўтиши режалаштирилган эди, аммо шифокорлар Жалоловга рингга чиқишга рухсат беришмади.
“Жанг бекор қилинди. Кичик герпес муаммоси туфайли менга рингга чиқишга рухсат беришмади. Ҳам мен, ҳам рақибим жанг қилишни хоҳладик, аммо комиссия рухсат бермади. Менда бу ҳолат болалигимдан бор — бошқа мамлакатга сафар қилганимда ёки иқлим ўзгарганда шундай бўлади”, — деди икки карра Олимпиада чемпиони.
Жалолов ушбу жангга АҚШнинг Индио шаҳрида тайёргарлик кўрган эди.
Маълумот учун, Жалолов профессионал фаолиятида 14 та жанг ўтказиб, барчасида нокаут орқали ғалаба қозонган. Унинг сўнгги жанги 2023 йилда Тошкентда бўлиб ўтган бўлиб, у Жанубий Африкалик Крис Томпсонни биринчи раунддаёқ мағлуб этган. Спилмонт эса 2024 йилда Артсиом Чарнякевични тўртинчи раундда нокаутга учратиб, ғалаба қозонган.
