Ўзбекистонда солиқ бошқарувининг янги моделини жорий этиш бўйича эксперимент бошланмоқда. Бу Президентнинг 2025 йил 28 ноябрдаги қарорида назарда тутилган.
2026 йил 1 январдан бошлаб солиқ қарзини ундиришда электр энергияси бўйича биллинг тизимидан фойдаланиш механизми жорий этилади. Ушбу чора жисмоний шахслардан ундириладиган мол-мулк ва/ёки ер солиғи бўйича 1 миллион сўмдан ортиқ умумий қарздорликка нисбатан қўлланилади.
Янги модель Солиқ қўмитаси ҳамда Иқтисодиёт ва молия вазирлиги таклифига кўра Наманган вилоятида синовдан ўтказилади.
«Ҳудудий электр тармоқлари» матбуот хизмати хабар беришича, янги тизим доирасида ер солиғи ва мол-мулк солиғи бўйича 1 миллион сўмдан ортиқ қарздорликка эга бўлган фуқаролар учун электр энергияси тўловини чеклаш кутилмоқда. Механизм бўйича бу Тошкентдаги амалиётга ўхшаш бўлади, у ерда 2025 йил август ойидан бошлаб чиқинди ташиш учун қарздорларнинг электр энергияси тўлови чекланмоқда.
Иқтисодий тадқиқотлар ва ислоҳотлар маркази маълумотларига кўра, 2025 йил 12 июль ҳолатига Наманган вилоятида мол-мулк солиғи ва ер солиғи бўйича қарздорлиги бўлган 369 минг нафар жисмоний шахс мавжуд. Улардан 43,4 минг нафарининг (12%) қарзи 1 миллион сўмдан ошган.
Солиқ қўмитасига 2026 йил 1 октябргача мазкур эксперимент натижаларини таҳлил қилиш ва уни республиканинг бошқа ҳудудларида ҳам жорий этиш бўйича таклифларни Вазирлар Маҳкамасига киритиш топширилди.