Тошкентда 43 ёшли ҳайдовчи Poytaxt Parking компаниясининг эшитиш ва нутқида ногиронлиги бўлган инспекторини ҳақоратлагани учун 3 суткага қамоқ жазоси олди. Ҳодиса 2025 йил 29 июль куни содир бўлган, жиноят ишлари бўйича Миробод туман суди ишни кўриб чиқиб, 8 август куни қарор чиқарган.
Poytaxt Parking компаниясида ҳодиса тафсилотларини сўзлаб беришди. Компания ҳайдовчиларнинг инспекторларни, жумладан, кар-соқов инспекторларни ҳақорат қилиш ҳолатлари кам эмаслигини маълум қилди. Компаниянинг қайд этишича, барча инспекторларда содир бўлаётган воқеаларни ёзиб олувчи бодикамералар мавжуд. Ёзувлар судда далил сифатида фойдаланилади.
Суд қарорига кўра, муқаддам маъмурий жавобгарликка тортилган ҳуқуқбузар Г.Х. Миробод деҳқон бозори (собиқ “Госпиталь” бозори) яқинидаги ҳодиса пайтида маст ҳолатда бўлган. Видеода (қуйида келтирилган) у ҳақоратли сўзларни айтиб, қўлларини силкитаётганини кўриш мумкин. Шу билан бирга, у бир пачка пул чиқариб, уни Paynet инфокиоски орқали тўлаш мумкинлигини кўрсатаётган инспекторга узатади.
Эркакка нисбатан маъмурий баённома тузилди. Судда у ўз айбига иқрор бўлиб, оилавий муаммолар фонида ҳиссий ҳаяжон ҳолатида бўлганини айтди. У суддан енгиллик сўради.
Судья М.Аҳмедов раислигидаги суд Г.Х.ни Ўзбекистон Маъмурий жавобгарлик тўғрисидаги кодекснинг 183-моддаси (майда безорилик) билан айбдор деб топиб, унга 3 сутка маъмурий қамоқ жазоси тайинлади.
Шу билан бирга, суд эркакнинг расмий иш жойи йўқлигини инобатга олиб, уни махсус қабулхонада сақлаш харажатларини бир сутка учун базавий ҳисоблаш миқдорининг 15% миқдорида тўлашдан озод қилди.
