2026 йил январь ойи якунларига кўра, Ўзбекистонда янги енгил автомобиллар сотуви 2025 йилнинг шу даврига нисбатан 7,2 фоизга ошиб, 28,6 минг донани ташкил этди. Бу ҳақда Иқтисодий тадқиқотлар ва ислоҳотлар маркази (ИТИМ) шарҳида сўз боради.
Ўтган ойда бирламчи бозорда энг юқори фаоллик Бухоро, Қашқадарё, Фарғона ва Сурхондарё вилоятларида қайд этилди. Шу билан бирга, Самарқанд ва Хоразм вилоятларида, шунингдек, Тошкент шаҳрида янги автомобилларни сотиш ҳажми камайган.
Маҳаллий ишлаб чиқарилган янги автомобиллар сотуви 24 минг донадан ошиб, 2025 йилнинг январь ойидаги кўрсаткичдан 11 фоиздан кўпроққа юқори бўлди. Шу билан бирга, хорижда ишлаб чиқарилган янги автомобиллар савдоси қарийб 4400 донани ташкил этди — бу бир йил олдингига нисбатан 10 фоизга кам.
Электромобиллар — асосий драйвер
ИТИМ маълумотларига кўра, январда электромобиллар сотуви 9 фоизга ошиб, 6100 донага етди. Барча сотувларнинг 62 фоизидан ортиғи Тошкент шаҳрига тўғри келди — қарийб 3700 та электромобиль. Ҳудудларда ҳам сезиларли ўсиш қайд этилган:
- Самарқанд вилоятида — 3,5 баравар,
- Наманганда — 2,4 баравар,
- Сурхондарёда — 5 баравар,
- Хоразмда — 3 баравар.
Бунда электромобилларнинг бирламчи бозори 45,3 фоизлик рекорд ўсишни кўрсатди ва қарийб 4700 донани ташкил этди.
ИТИМ автомобилларнинг умумий бозори, жумладан, иккиламчи бозор бўйича маълумотларни эълон қилмади. Масалан, 2025 йилнинг январида енгил автомобиллар сотуви йиллик ифодада 38,5 фоизга сезиларли даражада пасайган эди.
Эслатиб ўтамиз, 2025 йил якунларига кўра Ўзбекистонда 457,9 минг дона енгил автомобиль ишлаб чиқарилган бўлиб, бу бир йил олдингига нисбатан 6,7 фоизга кўп. Умумий ўсишга қарамай, оммавий бўлган Cobalt, Damas ва Onix моделларини ишлаб чиқариш камайди. Бозорда Chevrolet улуши 83,2 фоизгача пасайди, Хитой ва бошқа брендларнинг ишлаб чиқарилиши эса бир неча баравар ошди.
Президент Шавкат Мирзиёев 13 февралдаги йиғилишда автомобиль ишлаб чиқаришни 510 минг донага етказиш вазифасини қўйди.