Тошкент вилоятининг Ўртачирчиқ туманида парвозларни қидирув ва авария-қутқарув таъминоти бўйича ўқув машғулотлари ўтказилди, дея хабар берди Uzbekistan Airports компанияси матбуот хизмати.
Машғулотларда Фавқулодда вазиятлар вазирлиги, Мудофаа вазирлиги, Ички ишлар вазирлиги, Миллий гвардия, Соғлиқни сақлаш вазирлиги ва Uzbekistan Airports ходимлари иштирок этди.
Шартли фавқулодда ҳодиса оқибатларини бартараф этишга жами 250 га яқин киши ва идоралараро тузилмаларнинг 20 та махсус техникаси жалб этилди.
Фавқулодда хизматлар сценарий бўйича машғулот ўтказди, унга кўра йўловчи самолёти қўниш учун яқинлашаётганда диспетчерлик маркази ва экипаж ўртасида алоқа узилиб қолган. Афсонага кўра, самолёт Тошкент шаҳри ташқарисида, шаҳар атрофида ҳалокатга учраган, натижада ёнғин келиб чиққан, ҳалок бўлганлар ва жабрланганлар бор.
Вазифага кўра, диспетчерлар фавқулодда ҳодиса ҳақидаги маълумотни аэропортнинг авария-қутқарув хизматига тезкорлик билан етказди, у ҳам ўз навбатида бошқа идораларни хабардор қилди.
Идоралар ходимлари қутқарув гуруҳларининг шайлиги, ёнғинни ўчириш, одамларни эвакуация қилиш, жабрланганларни аҳволининг оғирлик даражасига қараб тақсимлаш, биринчи ёрдам кўрсатиш ва тиббиёт муассасаларига ташиш, шунингдек, афсонага кўра, бортда бўлган хавфли юкларни тушириш бўйича ҳаракатларни амалга оширди.
«Ҳаво порти ичидаги машғулотлардан ташқари, Uzbekistan Airports йилига бир неча марта аэропортлардан ташқарида ҳам бу каби кенг кўламли ўқув тадбирларини ўтказади. Уларнинг асосий мақсади – авиация ҳодисаси юз берганда вазирлик ва идоралар ҳамда Тошкент аэропорти бўлинмалари ўртасидаги идоралараро ҳамкорликни йўлга қўйиш, шунингдек, ходимларнинг тайёргарлигини оширишдан иборат», – дейилади Uzbekistan Airports хабарида.
Машғулотлар якунида қабул қилинган қарорлар таҳлил қилиниб, идоралар ўртасидаги ҳамкорликни яхшилаш бўйича тавсиялар ишлаб чиқилди.
«Тошкент аэропорти ва ҳамкорликдаги идораларнинг куч ва воситалари юқори баҳоланиб, ҳақиқий ҳалокат юз берган тақдирда тезкор ҳаракат қилишга тўлиқ тайёр деб топилди», – дея хабар берди Uzbekistan Airports.
