Ўзбекистон Ташқи ишлар вазирлиги АҚШда транспорт воситаларини бошқараётган фуқароларга мурожаат эълон қилди.
Унда айтилишича, бутун мамлакат бўйлаб федерал иммиграция органлари назорат-текширув тадбирларини ва текширувларни кучайтирган.
Текширувлар давомида ҳайдовчилик гувоҳномаларининг ҳақиқийлиги, шахсий ҳужжатларнинг амал қилиш муддати ва қонунийлиги, ишга рухсатнома мавжудлиги ва иммиграция мақоми, шунингдек, ҳайдовчиларнинг инглиз тилини билишига алоҳида эътибор қаратилмоқда.
«Бу чоралар АҚШ ҳукуматининг ноқонуний миграцияга қарши кураш чораларини кучайтириши муносабати билан қабул қилинган бўлиб, бу ҳокимият органлари қоидаларга риоя этилишини таъминлаш бўйича кенг ваколатларга эга бўлган федерал трассаларда операцияларнинг фаоллашувига олиб келди», — дейилади хабарда.
Яқинда АҚШ расмийлари Ўзбекистон фуқаролари қўлга олингани ҳақида хабар берди, улардан бири бир нечта ҳайдовчилик гувоҳномасидан фойдаланган, бошқаси эса Ватанида қидирувда бўлган.
ТИВ АҚШда транспорт воситаларини бошқараётган барча Ўзбекистон фуқароларидан қонуний иммиграция мақомини тасдиқловчи ҳужжатларни ёнида олиб юришни ва барча ҳужжатлар ҳақиқий ҳамда тартибда эканлигига ишонч ҳосил қилишни қатъий тавсия қилди.
Шубҳали ёки мураккаб вазият юзага келганда, фуқароларга Ўзбекистоннинг АҚШдаги дипломатик ва консуллик муассасаларига зудлик билан мурожаат қилиш тавсия этилди.
