АҚШ президенти Дональд Трамп маъмурияти Америка олий ўқув юртларида таҳсил олаётган хитойлик талабаларнинг визаларини бекор қилишни бошлайди, деб баёнот берди давлат котиби Марко Рубио. Бу чора АҚШ ҳукумати фикрича, ХХР Коммунистик партияси билан алоқаси бор ва «муҳим соҳаларда» таҳсил олаётганларга тегишли бўлади.
«Президент Трамп раҳбарлиги остида АҚШ Давлат департаменти Ички хавфсизлик вазирлиги билан биргаликда хитойлик талабаларнинг, жумладан Хитой Коммунистик партияси билан алоқаси бор ва муҳим соҳаларда таҳсил олаётганларнинг визаларини агрессив тарзда бекор қилиш устида ишлайди», — дейилади Рубионинг Давлат департаменти сайтидаги баёнотида.
«Биз, шунингдек, ХХР ва Гонконгдан келадиган барча бўлажак виза аризаларини янада синчковлик билан текшириш учун виза бериш мезонларини қайта кўриб чиқамиз», — дейилади баёнотда.
New York Times хабар беришича, Давлат департаменти ва Ички хавфсизлик вазирлиги хитойлик талабаларнинг визаларини бекор қилиш жараёнини қанчалик тез бошлаши ҳозирча аниқ эмас. Шунингдек, Америка ҳукумати «ХХР Коммунистик партияси билан алоқаси бор» талабаларни қандай мезонлар асосида аниқлаши ҳам ноаниқ.
Хитой ТИВ Вашингтоннинг режаларига нисбатан АҚШ ҳукуматига норозилик билдириб, уларни камситувчи амалиёт деб атади.
«Америка томонининг хитойлик талабалар учун визаларни мафкура ва миллий хавфсизлик баҳонасида асоссиз равишда бекор қилиши хитойлик талабаларнинг қонуний ҳуқуқ ва манфаатларини жиддий равишда бузади ҳамда икки давлат халқлари ўртасидаги нормал алмашинувларни издан чиқаради», — деди идора матбуот котиби Мао Нин.
Рубионинг баёноти АҚШ элчихоналари ва консулликларига Трамп маъмуриятининг ариза берувчиларнинг ижтимоий тармоқлардаги аккаунтларини текширишни кенгайтириш режалари туфайли F, M ва J тоифасидаги талабалик визаларини олиш учун янги суҳбатларни вақтинча тайинламаслик ҳақидаги кўрсатмасидан сўнг берилди. Бундан олдин АҚШ ҳукумати Гарвард университетига олий ўқув юртининг ҳукумат талабларига бўйсунишдан бош тортгани сабабли хорижий талабаларни қабул қилишни тақиқлаган эди.
Халқаро таълим институти (Institute of International Education, IIE) ҳисоботига кўра, 2023-2024 ўқув йилида АҚШ олий ўқув юртларида 1,1 миллиондан ортиқ хорижий талаба таҳсил олган. Хитойлик талабалар сони бўйича иккинчи ўринда бўлиб — 277,3 минг киши, 24,6%ни ташкил этган.
