АҚШ Президенти Дональд Трамп Қўшма Штатлар томонидан санкциялар қўйилган ҳамда Венесуэлага келаётган ва у ердан кетаётган барча нефть танкерлари учун «тўлиқ ва ҳар томонлама блокада» жорий этилаётганини эълон қилди, деб хабар бермоқда CNN.
Трамп ўзининг Truth Social ижтимоий тармоғидаги постида минтақада катта миқдордаги Америка ҳарбий техникаси мавжудлигини қайд этди, Венесуэла раҳбари Николас Мадуро режимини танқид қилди ва Каракасга ер, нефть ва бошқа активларни АҚШга беришни таклиф қилди.
«Венесуэла Жанубий Америка тарихидаги энг йирик Армада билан тўлиқ ўраб олинган. У фақат ўсиб боради ва улар илгари ҳеч қачон кўрмаган даҳшатни ҳис қиладилар — токи улар илгари биздан ўғирлаб олган барча нефть, ер ва бошқа мулкларни Америка Қўшма Штатларига қайтармагунларича», — деди Трамп.
«Мадуронинг ноқонуний режими ушбу ўғирланган конлардан олинадиган нефтдан ўз фаолиятини молиялаштириш, наркотерроризм, одам савдоси, қотиллик ва одам ўғирлаш учун фойдаланмоқда», — дея қўшимча қилди АҚШ Президенти.
Бундай қадам АҚШнинг қуруқликдан зарба бериш таҳдиди билан биргаликда Каракасга бўлган босимни кучайтирди ва унинг иқтисодий таянчи бўлган нефть савдосига зарба берди, деб қайд этади CNN.
Венесуэла ҳукумати Трампнинг баёнотини қоралаб, уни «мулоҳазасиз ва жиддий таҳдид» деб атади. Каракас АҚШ Президенти «Ватанимизга тегишли бойликларни ўғирлаш мақсадида мутлақо мантиқсиз равишда Венесуэланинг денгиз блокадасини ўрнатишга интилаётганини» маълум қилди.
Венесуэланинг нефть захиралари дунёда энг йириги ҳисобланади, бироқ халқаро санкциялар туфайли қазиб олиш ҳажми кам. Мамлакат нефтининг катта қисми Хитойга сотилади.
Америка компаниялари 1970-йилларда ҳукумат соҳани давлат назоратига олгунига қадар Венесуэла нефть секторида фаол иштирок этган. Трамп АҚШни Каракаснинг нефть саноатига қайтариш истагини яширмаяпти, деб ёзади CNN.
АҚШнинг Венесуэлага қарши санкциялари 2005 йилдан бери амал қилмоқда, 2019 йилда эса Трамп ўзининг биринчи президентлик муддатида Petróleos de Venezuela (PDVSA) давлат компаниясидан АҚШга хом нефть экспортини амалда тўсиб қўйган эди. 2022 йилда Президент Джо Байден Американинг Chevron компаниясига Венесуэлада нефть қазиб олиш учун рухсат берганди. Трамп 2025 йил март ойида ушбу лицензияни чақиртириб олди, бироқ кейинроқ Мадуро ҳукуматига ҳеч қандай даромад тушмаслиги шарти билан уни қайтадан тақдим этди.
Ўтган ҳафтада Америка ҳарбийлари Венесуэла қирғоқлари яқинида нефть юкланган Skipper танкерини қўлга олди. АҚШ ушбу танкерга нисбатан санкцияларни 2023 йилдаёқ жорий этган бўлиб, унда контрабанда нефти ташилгани ва сотувдан тушган маблағлар Ливаннинг «Ҳизбуллоҳ» қуролли гуруҳига ҳамда Эрон Ислом инқилоби муҳофизлари корпусининг «Қудс» бўлинмасига йўналтирилганини даъво қилган эди.