АҚШ президенти Дональд Трамп маъмурияти Николас Мадуро ўғирлаб кетилганидан кейин ушбу лавозимни эгаллаган Венесуэла муваққат президенти Делси Родригесга нисбатан яширинча жиноий айблов тайёрламоқда, деб хабар берди Reuters вазиятдан хабардор тўртта манбага таяниб.
Агентлик суҳбатдошларининг сўзларига кўра, федерал прокурорлар коррупция ва пул ювиш бўйича айбловлар тайёрламоқда ва агар Родригес Мадуро ағдарилганидан кейин Трампнинг талабларини бажаришда давом этмаса, унга нисбатан таъқиб олиб борилиши ҳақида уни оғзаки равишда огоҳлантирган.
Айблов лойиҳаси сўнгги икки ой давомида Майами прокуратураси томонидан тайёрланмоқда, деб аниқлик киритди Reuters манбалари. Тергов Родригеснинг PDVSA давлат нефть компаниясидаги пулларни ювишда тахмин қилинган иштироки билан боғлиқ бўлиб, 2021 йилдан 2025 йилгача бўлган даврни қамраб олади, деди манбалар.
Америкалик мулозимлар, шунингдек, Родригесга камида 7 нафар собиқ юқори мартабали амалдорлар, уларнинг ҳамтовоқлари ва оила аъзолари рўйхатини тақдим этган бўлиб, уларни Венесуэлада ҳибсга олиш ёки эҳтимолий экстрадиция қилиш учун қамоқда қолдиришни талаб қилмоқда.
АҚШ Адлия вазирлиги, Оқ уй ва Давлат департаменти Reuters сўровига жавоб бермади. АҚШ бош прокурори ўринбосари Тодд Бланш Reuters нашрининг қисқача мазмунини шарҳлар экан, буни «мутлақо ёлғон» деб атади.
Делси Родригес 2026 йил 3 январга ўтар кечаси Николас Мадуро америкалик ҳарбийлар томонидан қўлга олинганидан кейин Венесуэла муваққат президенти бўлди. Сиёсатчи ва унинг рафиқаси Силия Флорес Нью-Йоркка олиб кетилди. Америка расмийлари Мадурони наркотерроризм мақсадида тил бириктириш, кокаин олиб кириш, АҚШга қарши ишлатиш мақсадида қурол ва портловчи қурилмаларни сақлашда айбламоқда.
Шундан сўнг Дональд Трамп АҚШ Венесуэлани «ҳокимиятнинг хавфсиз, тартибли ва қонуний топширилишини амалга оширмагунимизча» бошқаришини, шунингдек, мамлакатнинг нефть заҳираларини назорат остига олишини маълум қилди.
Трамп Родригесдан «мамлакатни тиклашимиз учун нефть ва бошқа нарсаларга тўлиқ йўл очиб беришни» талаб қилди ва агар у ўзини «тўғри тутмаса», уни Мадуроникидан ҳам ёмонроқ тақдир кутиши мумкинлиги билан таҳдид қилди.