АҚШ президенти Дональд Трамп Қўшма Штатлар ва Хитой савдо келишувини тузишга келишиб олганини эълон қилди.
“Хитой билан келишувимиз тайёр ва ХХР раиси Си [Цзиньпин] ҳамда мен томонимдан якуний келишувга эришилади”, — дея ёзди Трамп ўзининг Truth Social ижтимоий тармоғида.
Унинг сўзларига кўра, Пекин АҚШга магнитлар ва ноёб ер минералларини етказиб беради, Вашингтон эса хитойлик талабаларга Америка коллеж ва университетларида ўқишга рухсат беради.
Келишув доирасида Вашингтон Хитой товарларига божларни 55% гача, Пекин эса Америка товарларига божларни 10% гача камайтиради, деди Трамп.
“Президент Си ва мен Хитойни Америка савдоси учун очиш мақсадида яқин ҳамкорлик қиламиз. Бу иккала мамлакат учун ҳам катта ҒАЛАБА бўлади!!!”, — дея кейинроқ ўз баёнотини тўлдирди Трамп.
АҚШ 2025 йил февраль ойида Хитойдан келадиган товарларга нисбатан божларни жорий этишни бошлаган ва апрель ўрталарига келиб уларнинг миқдори 145% га етган эди. Бунга жавобан Пекин АҚШ маҳсулотларига нисбатан божларни 125% гача оширди.
АҚШ ва Хитой ўртасидаги савдо музокаралари май ойидан бери давом этаётган эди. Биринчи босқич Женевада, иккинчиси Лондонда бўлиб ўтди. Май ойида Женевадаги музокаралар якунларига кўра, АҚШ божларни 145% дан 30% гача камайтиришга, Хитой эса 125% дан 10% гача 90 кун муддатга камайтиришга рози бўлган эди. Кейинроқ мамлакатлар бир-бирини келишувларни бузганликда айбладилар.
