АҚШ президенти Дональд Трамп Россия президенти Владимир Путинга Украина билан сулҳ тузиш учун ўзи белгилаган муддатни 50 кундан 10-12 кунгача қисқартирганини маълум қилди, деб хабар беради CNN.
«Мен бугундан бошлаб 10 ёки 12 кунлик янги муддат белгиламоқчиман», — деди Трамп 28 июль куни Шотландияда Буюк Британия бош вазири Кир Стармер билан учрашув чоғида журналистларга.
«Кутишнинг маъноси йўқ. Мен сахий бўлишни истайман, аммо биз ҳеч қандай силжишни кўрмаяпмиз», — дея қўшимча қилди АҚШ президенти.
Агар Россия ўт очишни тўхтатишдан бош тортса, Трамп яна «санкциялар ва, эҳтимол, божхона тўловлари, иккиламчи божхона тўловлари» жорий этиш билан таҳдид қилди. Иккиламчи санкциялар Россия билан савдо қилувчи ҳар қандай давлат, хусусан, Россия нефти ва газини импорт қилувчи Хитой ва Ҳиндистон учун хавф туғдириши мумкин, деб ёзади New York Times.
Трамп Путиннинг ўт очишни тўхтатиш бўйича келиша олмаганидан хафсаласи пир бўлганини билдирди.
«Россия ҳозир жуда бой бўлиши мумкин эди. Бунинг ўрнига улар ҳамма пулни урушга сарфлашмоқда. Улар ҳамма нарсани урушга ва одамларни ўлдиришга сарфламоқда. Бу менга мантиқсиз туюлади», — деди у ва Путин «бунга тезроқ чек қўйишни хоҳлайди» деб ўйлаганини қўшимча қилди.
Трамп, шунингдек, Путин билан гаплашишга қизиқиши қолмаганини айтди.
«Менга гаплашиш унчалик қизиқ эмас. Бизнинг шундай ёқимли суҳбатларимиз, шундай ҳурматли ва яхши суҳбатларимиз бўлган эди. Кейинги тунда эса шаҳарларга ракеталар учиб келиб, одамлар ҳалок бўлмоқда», — деди АҚШ президенти.
«Мен президент Путин билан кўп гаплашганман. Мен у билан жуда яхши муносабатлар ўрнатганман… Биз кўп марта бу масалани [Украинада ўт очишни тўхтатиш] ҳал бўлди деб ўйлаганмиз, лекин кейин президент Путин чиқиб, Киев каби бирор шаҳарга ракеталар учиришни бошлайди ва қариялар уйида ёки бошқа жойда кўплаб одамларни ўлдиради», — деди Трамп.
Украина президенти Владимир Зеленский Трампнинг баёнотини «ўта муҳим» деб атади. «Агар биз кучли ва қатъиятли ҳаракат қилсак, тинчлик мумкин, ва биз бир неча бор айтганмиз — ва барча ҳамкорлар буни билишади — санкциялар асосий элементдир. Россия санкцияларни ҳисобга олади, бундай йўқотишларни ҳисобга олади», — деб ёзди X ижтимоий тармоғида.
Кремлда Трампнинг «Украина инқирозини ҳал қилиш муддатлари бўйича» баёнотини «маълумот учун қабул қилганликларини» айтишди. Путиннинг матбуот котиби Дмитрий Песков Москва «тинчлик жараёнига содиқ қолишда давом этаётганини» таъкидлади.
Июль ўрталарида Трамп, агар Россия 50 кун ичида Украина билан тинчлик келишувини тузмаса, Россиядан келадиган товарларга 100% бож тўловлари жорий этиш билан таҳдид қилган эди. Ўшанда у АҚШ ва НАТОнинг Украинага қурол етказиб бериш бўйича келишувини ҳам эълон қилган эди.
