Ўзбекистон Президенти Шавкат Мирзиёев 2026 йил 18 февраль куни Вашингтонда Америка бизнеси вакиллари билан учрашувда нутқ сўзлаб, инвестиция лойиҳаларини тўлиқ қўллаб-қувватлашга тайёрлигини билдирди.
Тадбирни очар экан, давлат раҳбари мулоқотнинг янги форматини алоҳида қайд этди:
«Бугун биринчи марта вазирларимиз, бош вазир ўринбосарлари, ҳокимларимиз уланган, чунки сизнинг ҳар бир сўзингиз, ҳар бир лойиҳангиз биз учун жуда муҳим. Улар ҳаётга татбиқ этилиши ва Ўзбекистонда ишлашингиз учун қулай шароитлар яратишимиз керак».
Унинг сўзларига кўра, ушбу учрашув ўтган йил якунида ўтказилган давра суҳбатининг мантиқий давоми бўлиб, иқтисодий шериклик стратегик ишонч ва ўзаро манфаатдорлик даражасига ўтганидан далолат беради.
«Бугун муҳокамалардан амалий ишга ўтиш учун йиғилганимиздан хурсандман», — деди у «Ўзбекистон 24» телеканали сюжетида.
Президент жаҳон иқтисодиёти чуқур трансформацияни бошдан кечираётганини, бундай шароитда шерикларнинг ишончлилиги ва қоидаларнинг барқарорлиги муҳим аҳамият касб этишини таъкидлади. «Биз Америка Қўшма Штатлари билан ҳамкорликни айнан шу мантиқ асосида қурмоқдамиз».
Давлат раҳбари сўнгги 8 йилда амалга оширилган ислоҳотларни эслатиб ўтди: «Биз валюта бозорини очдик, солиқ ва божхона тартиб-таомилларини соддалаштирдик, бюрократияни қисқартирдик, рақамлаштиришни кучайтирдик ва тезлаштирдик, инвесторларни қўллаб-қувватлашнинг янги механизмларини ишга туширдик. Сўнгги йилларда ЯИМнинг ўртача ўсиши 6,5 фоизни ташкил этди».
2030 йилга бориб Ўзбекистон саноат ишлаб чиқаришини икки баравар оширишни, юқори технологияли маҳсулотлар улушини эса учдан бир қисмга етказишни мақсад қилган. Бу камида 35 миллиард доллар инвестиция жалб этиш ва ҳар йили 250 мингтагача янги иш ўрни яратиш имконини бериши кутилмоқда.
Президент нафақат лойиҳалар кўлами, балки уларнинг сифати, технологик даражаси, ишлаб чиқариш кооперацияси ва индустриал ривожланишга қўшадиган ҳиссаси устувор аҳамиятга эга эканини таъкидлади.
«Биз олдинга қараб интиляпмиз ва Ўзбекистонда кучли, технологик ва адолатли иқтисодиётни шакллантиряпмиз. Бугун биз АҚШ билан биргаликда ўсишимиз мумкин бўлган йўналишларни аниқ кўриб турибмиз. Шу муносабат билан асосий тармоқлар — муҳим хомашё, нефть-кимё ва энергетика, қишлоқ хўжалиги, паррандачилик ва бошқа соҳалар бўйича лойиҳалар имзолашга тайёрланди».
У лойиҳаларни кенгайтириш учун барқарор молиявий воситалар зарурлигини айтди. Учрашув якунида устувор лойиҳаларни тизимли равишда илгари суриш учун мамлакатлар ўртасида инвестиция платформасини ташкил этиш тўғрисида келишув имзоланди.
Шавкат Мирзиёев бу «жуда яхши база ва тўғри йўналиш» эканини кўрсатиб ўтди.
«Ўйлайманки, кўплаб компаниялар ундан самарали фойдалана олишади. Яқин вақт ичида натижалар кўзга ташланишига ишончим комил. Бунга шубҳа қилмаймиз… Сизнинг Ўзбекистондаги лойиҳаларингиз нафақат бизнинг иқтисодиётимизга сармоя, балки АҚШ ускуналарини етказиб бериш ва Америкадаги ишлаб чиқариш қувватларини юклаш ҳамдир», — деди давлат раҳбари.
Шунингдек, у АҚШ Президенти Дональд Трамп билан мулоқотда иқтисодий кун тартибининг аҳамиятини таъкидлади:
«Биз ҳар гал учрашганимизда ҳар бир йўналиш бўйича жиддий ишлаймиз. Бу мамлакатларимиз ўртасидаги стратегик шерикликнинг асосий устунларидан бири. Ўзбекистон Америка учун бундан кейин ҳам ишончли, барқарор ва масъулиятли шерик бўлиб қолишга тайёр», — деди Мирзиёев.
Президентнинг сўзларига кўра, ҳозирги учрашув шерикликнинг амалий ижро босқичига ўтганининг тасдиғи.
«Ҳозир стратегик қарорлар қабул қилиш учун энг тўғри вақт. Биз барқарор қоидаларни, лойиҳани барча босқичларда тўлиқ қўллаб-қувватлаш ва кузатиб боришни таъминлаймиз. Барча вазирлар ва ҳудудлар раҳбарлари лойиҳанинг муваффақиятли амалга оширилиши учун шахсан жавобгар бўладилар».
Президент ҳокимият вакиллари инвесторлар билан тезкор ишлашга тайёрлигини қўшимча қилди: «Бугун сиз ўзингиз фаолият юритадиган ҳудуддаги ‘тугмани босишингиз’ мумкин. Ҳоким ва вазирлар ихтиёрингизда бўлади. Сиз биз учун нақадар муҳим эканингизни тушунишингиз учун мен уларни бугун мулоқотга уладим».
Якунда Мирзиёев Америка бизнеси ва молиявий институтларига ишонч учун миннатдорлик билдирди.
«Барча қўшма лойиҳаларимиз амалга оширилишига ва икки мамлакат ўртасидаги ўзаро манфаатли муносабатлар ривожига ҳисса қўшишига ишонаман. Сизни яна бир бор ишонтириб айтмоқчиман: Ўзбекистон билан ҳамкорлик қилиб, тўғри танлов қилганингизга амин бўлишингиз керак. Мен бу ерга биринчи марта келаётганим йўқ. Сизга нима халақит бераётганини, сизга нима кераклигини, президент қандай қарорлар қабул қилиши лозимлигини эшитишни жуда хоҳлайман. Яқин орада ҳақиқий натижа бўлиши учун бутун жамоам ихтиёрингизда».
2026 йил 18 февраль куни Шавкат Мирзиёев иштирокидаги тадбирда Gulf томонидан ёқилғи қуйиш шохобчалари тармоғини қуриш, ёмғирлатиб суғориш технологияларини жорий этиш, муҳим минералларни қазиб олиш ва етказиб бериш, паррандачилик кластерини ташкил этиш, агросаноат мажмуасини, молия бозорини ривожлантириш ва инвестиция муҳитини яхшилашга оид икки томонлама ҳужжатлар ҳам имзоланди.