АҚШ Ғазначилик департаменти мамлакат тарихида мисли кўрилмаган янгиликни эълон қилди: Дональд Трамп банкноталарда имзоси туширилган илк амалдаги президентга айланади.
Трампнинг имзоси Ғазначилик котиби Скотт Бессентнинг имзоси билан ёнма-ён жойлашади. Департамент вакилларининг таъкидлашича, бу қадам Америка мустақиллигининг 250 йиллигига бағишланган ўзига хос совға бўлади.
Бессентнинг сўзларига кўра, АҚШ долларларида президент исмининг қайд этилиши мамлакатнинг тарихий ютуқлари ва Дональд Трампнинг шахсий ҳиссасини эътироф этишнинг энг кучли усули. Анъанага кўра, АҚШ банкноталарида фақат ғазначилик мулозимларининг имзолари бўлган.
Янги намунадаги 100 долларлик купюраларни босиб чиқариш 2026 йилнинг июнь ойида бошланиши режалаштирилган. Шундан сўнг бошқа номиналдаги пуллар ҳам босқичма-босқич янгиланади. Ҳозирда муомалага чиқарилаётган пулларда собиқ президент Жо Байден даврида тайинланган Жанет Йеллен ва Линн Малербанинг имзолари мавжуд.
Маълумот учун, 1861 йилдан бери давом этиб келаётган анъанага кўра, долларларда АҚШ ғазначисининг имзоси бўлиши шарт эди. Трамп маъмуриятининг янги режаси эса ушбу узоқ йиллик анъанага нуқта қўйиши мумкин.
Бироқ, бу янгилик ҳамма томонидан бирдек кутиб олинмади. Калифорния штати губернатори ва Трампнинг ашаддий танқидчиси Гэвин Ньюсом ижтимоий тармоқлардаги саҳифасида бу қарорни кескин қоралади. Унинг фикрича, энди америкаликлар озиқ-овқат, ижара ва ёқилғи нархи ошганда кимни айбдор қилишни аниқ билиб олишади.
Эслатиб ўтамиз, аввалроқ АҚШда мамлакатнинг 250 йиллиги шарафига Дональд Трамп тасвири туширилган 24 каратли олтин тангалар чиқарилиши ҳам маъқулланган эди. Президентнинг биринчи муддати даврида эса пандемия пайтида миллионлаб америкаликларга юборилган моддий ёрдам чекларида ҳам унинг исми қайд этилган эди.