АҚШ президенти Дональд Трамп 2025 йил 31 июль куни 69 та савдо ҳамкорига нисбатан 10% дан 41% гача миқдорда импорт божларини жорий этиш тўғрисидаги фармонни имзолади. Ҳужжат Оқ уй сайтида АҚШда 1 август бошлангунига, яъни Трамп томонидан Вашингтон билан савдо келишувларини тузиш учун белгиланган муддат тугашига бир неча соат қолганида эълон қилинди.
CNN’нинг ёзишича, фармонга кўра, АҚШга товарлар олиб кириш учун «умумий» тариф 10% даражасида қолади. У фақат АҚШ билан савдо баланси ижобий бўлган, яъни АҚШ уларга импортга қараганда кўпроқ экспорт қиладиган давлатларга нисбатан қўлланилади. Трамп маъмурияти вакили бу аксарият давлатларга тегишли эканини аниқлаштирди.
АҚШ билан савдо баланси тақчиллиги мавжуд давлатлар учун минимал тариф 15% этиб белгиланган. Бу божни тахминан 40 та давлат, шунингдек, Трамп билан рамка савдо келишувини тузишга муваффақ бўлган Европа Иттифоқи тўлайди.
АҚШ билан юқори савдо баланси тақчиллигига эга бўлган 26 та давлат 19% дан 41% гача божларга тортилади. Энг юқори божлар Сурияга (41%), Лаос ва Мьянмага — 40%дан берилди. Қозоғистон 25% миқдорида тариф тўлайди.
Янги божлар 2025 йил 7 августдан кучга киради.
Трамп алоҳида фармон билан Канадага нисбатан божларни 25% дан 35% гача оширди. Оқ уй баёнотида айтилишича, Канада АҚШга қарши «жавоб чоралари» кўрган ва фентанил савдосини чеклашда «ҳамкорлик қилмаган». Янги божлар АҚШ, Мексика ва Канада USMCA савдо келишуви билан қамраб олинган товарларга нисбатан татбиқ этилмайди.
Мексикага нисбатан 90 кун давомида 25% умумий бож амал қилишда давом этади. Муддатнинг узайтирилиши Мексика президенти Клаудия Шейнбаумнинг 2025 йил 31 июль куни Трамп билан суҳбатидан сўнг келишилган.
Рўйхатда Буюк Британия ва Хитой йўқ. Буюк Британия АҚШ билан келишув тузган биринчи давлат бўлди. Британиялик экспортчилар учун ставка 10% ни ташкил этди.
АҚШ Хитой билан 2025 йил июнь ойида дастлабки савдо келишувини тузган эди, бунда Вашингтон Хитой товарларига божларни 55% гача, Пекин эса Америка товарларига 10% гача пасайтирган. Аммо келишув муддати икки ҳафтадан сўнг тугайди.
АҚШ апрель ойида 180 дан ортиқ мамлакатдан импортга 10% миқдорида базавий божларни жорий этган эди. Вашингтоннинг энг яқин савдо ҳамкорлари бўлган ўндан ортиқ давлатга нисбатан «ўзаро», юқорироқ тарифлар белгиланган эди.
Кейинчалик Трамп ушбу мамлакатлар билан савдо келишувларини тузиш учун «ўзаро» тарифларни 90 кунга (1 августгача) тўхтатиб, фақат базавий божни қолдирган эди.
