Anorbankнинг якка акциядори, 48 ёшли ўзбекистонлик молиячи Қаҳрамонжон Олимов Париж марказида ўғирлаб кетиш қурбони бўлди, деб хабар бермоқда Le Monde.
Француз нашрининг ёзишича, у 2025 йил 23 июнь куни Франция пойтахтининг дабдабали туманида қўлга олиниб, Ницца яқинидаги вилланинг ертўласига олиб борилган, у ерда калтакланган, ўлдириш билан таҳдид қилинган ва кейин товон пули тўлангач озод қилинган (ўғирлаб кетиш тафсилотлари келтирилмаган).
Париждаги Hôtel-Dieu касалхонаси шифокорининг сўзларига кўра, Олимовда кўплаб кўкаришлар ва жароҳатлар қайд этилган. Унинг ўзи уйқусизлик ва доимий хавотирдан шикоят қилган. Тадбиркорнинг шахсий котиби Le Monde нашрига «бу ёқимсиз ҳолат бўлди, лекин ҳаммаси ортда қолди» деган.
У Парижга француз ҳамкорлари билан музокаралар олиб бориш ва кўчмас мулк сотиб олиш бўйича битимни расмийлаштириш учун келган эди.
Бу ҳолат юзасидан «бир гуруҳ шахслар томонидан ноқонуний равишда озодликдан маҳрум қилиш» моддаси бўйича жиноят иши қўзғатилган, бир киши ҳибсга олинган.
Қаҳрамонжон Олимов Anorbank рақамли банкининг (2020 йилда ташкил этилган) 99,38% акцияларига эгалик қилади, бу банк «миллиард доллардан ортиқ активларни бошқаради», шунингдек, Нидерландияда рўйхатдан ўтган компания орқали EDF билан ҳамкорликда Ўзбекистон жанубидаги Сурхондарё вилоятида газ турбинали электр станцияси қурилиши лойиҳасида иштирок этади.
Тадбиркор, шунингдек, Milliy To`lov Tizimlari (Hamyon хизмати), Clever Mikromoliya Tashkiloti микромолия ташкилоти, Distri For Country (тўловларни йиғиш агентликлари ва кредит бюролари фаолияти), Anor Assets (молиявий лизинг) ва Dynamic Energy (иссиқлик электр станциялари томонидан электр энергияси ишлаб чиқариш) компанияларидаги улушларга эгалик қилади. 2023 йилда унинг Ўзбекистондаги bi1 (француз супермаркетлари тармоғи) компаниясининг ҳам таъсисчиси бўлгани хабар қилинган эди.
