Ўзбекистон Давлат хавфсизлик хизмати (ДХХ) Андижон ва Тошкент вилоятларида мансабдор шахслар, давлат тузилмалари раҳбарлари ва бизнес вакиллари иштирокидаги коррупция ҳолатларини аниқлади.
Андижон вилоятининг Хонобод шаҳар ҳокими ўринбосари ва илгари судланган, алкоголли маҳсулотлар сотиш билан шуғулланувчи корхона раҳбари 20 минг доллар олаётганда қўлга олинди. Ушбу сумма эвазига улар маҳаллий тадбиркорга ҳокимлик балансида бўлган 4 гектар ерни аукционга алоҳида лот сифатида чиқаришда ёрдам беришни ваъда қилишган.
Улар, шунингдек, тадбиркорга 2 миллиард сўм эвазига савдода ғолиб чиқишини таъминлашга, кейинчалик бу ер участкасини унинг номига расмийлаштириб, матрас, профнастил ва болалар тагликлари ишлаб чиқариш корхонаси ташкил этишга ваъда беришган.
Бошқа бир ҳолатда, Андижон тумани собиқ ҳокими ўринбосари, Андижон шаҳар статистика бўлими бошлиғи ва уларнинг 2 нафар шериги болалар маҳсулотлари ишлаб чиқариш заводи қуришни режалаштирган тадбиркордан 600 минг доллар талаб қилган. Улар «Ипак йўли» эркин иқтисодий зонаси ҳудудидан 6 гектар ерни аукцион орқали сотиб олишда ёрдам беришни ваъда қилишган. Улар сўралган сумманинг 150 минг долларини аванс сифатида олаётганда қўлга олинди.
Бундан ташқари, ушбу ҳодисага Рақобатни ривожлантириш ва истеъмолчилар ҳуқуқларини ҳимоя қилиш қўмитаси Андижон вилояти бошқармасининг собиқ биринчи ўринбосари, ҳозирда хусусий бандлик агентлигини бошқараётган шахснинг алоқадорлиги аниқланди. Маълум бўлишича, у аввалроқ тадбиркордан ушбу масалада ёрдам учун 11 минг доллар олган.
Тошкент вилоятида Оҳангарон тумани Пенсия жамғармаси бўлими бошлиғи маҳаллий фуқародан йўқолган меҳнат дафтарчасини тиклаш ва ёшига кўра пенсия тайинлашда ёрдам бериш эвазига 1500 доллар пора олаётганда қўлга олинди. Ушбу мансабдор шахс илгари Жиноят кодексининг 167-моддаси (Ўзлаштириш ёки растрата йўли билан талон-торож қилиш) бўйича судланган.
Қўлга олинганларга нисбатан жиноят ишлари қўзғатилиб, уларга нисбатан қамоққа олиш эҳтиёт чораси қўлланилган. Тергов давом этмоқда.