Кенг кўламли реконструкциядан сўнг 2025 йил март ойида фойдаланишга топширилган Андижон аэропорти 12 август куни биринчи халқаро рейсни амалга оширди, дея хабар берди Uzbekistan Airports компанияси матбуот хизмати.
Биринчи йўналиш Flyone Asia авиакомпаниясининг Андижон — Жидда — Андижон йўналиши бўйича мунтазам рейси бўлиб, у ҳафтасига 2 марта — сешанба ва пайшанба кунлари амалга оширилади.
«Q7 2261 рейси байрамона муҳитда амалга оширилди, бортда 151 нафар йўловчи бор эди. Авиакомпания вакилларининг таъкидлашича, ушбу йўналишнинг йўлга қўйилиши зиёрат, сайёҳлик ва иш сафарлари имкониятларини кенгайтиради, шунингдек, Ўзбекистон ва Саудия Арабистони ўртасидаги алоқаларни мустаҳкамлайди», — дейилади хабарда.
Компания ҳозирда Андижондан Тошкентга ҳам мунтазам рейслар қатнови йўлга қўйилганини эслатди: Silk Avia (душанба ва пайшанба кунлари) ва Uzbekistan Airways (чоршанба ва шанба кунлари).
Аэропорт 2023 йил 1 апрелдан бошлаб ёпилган эди. 2025 йил март ойида реконструкциянинг биринчи босқичи якунланди ва 20 мартдан бошлаб мунтазам йўловчи рейсларини қабул қилишни қайта бошлади.
Аэропорт 1978 йилда қурилган бўлиб, замонавий авиация талабларига жавоб бермас эди. Учиш-қўниш йўлагининг юкланиш чеклови, замонавий ёритиш тизими ва бошқа инфратузилмалар йўқлиги сабабли аэропорт рейсларни қабул қилишда чекланган имкониятларга эга эди.
Реконструкциянинг биринчи босқичи доирасида узунлиги 3300 м ва кенглиги 60 м бўлган янги учиш-қўниш йўлаги, рулёж йўлаги ва ҳаво кемалари учун турар жойлар қурилди. Дренаж тизими янгиланди, ер ости сувлари йўқ қилинди. Иккинчи рулёж йўлагини қуриш, шунингдек, ИКАО стандартларига мувофиқ CAT-II тоифасидаги замонавий радиолокация, метеорология ва ёруғлик-сигнал ускуналарини ўрнатиш ишлари давом этмоқда.
Ушбу ишлар якунлангач, аэропорт Boeing ва Airbus русумидаги йирик самолётларни, шу жумладан тунги ва ноқулай об-ҳаво шароитидаги рейсларни ҳам қабул қила олади. Бу кунлик рейслар сонини 10 баробар ошириш имконини беради.
Иккинчи босқичда янги йўловчи терминалини қуриш режалаштирилган. Ўтказиш қуввати соатига 300 тадан 1000 нафар йўловчигача, рейслар сони эса йилига 584 тадан 3700 тагача ортади. Бу Андижон шаҳри ва бутун Фарғона водийси билан ҳаво қатнови имкониятларини сезиларли даражада кенгайтиради.