Ўзбекистон Олий суди раҳбариятида кадрлар ўзгариши юз берди. Бу ҳақда Олий Мажлис Сенати матбуот хизмати хабар берди.
Парламент юқори палатасининг қарорига асосан Алишер Атаханович Усмонов 5 йил муддатга Ўзбекистон Олий суди раисининг биринчи ўринбосари — суд ҳайъати раиси лавозимига сайланди. Қарор 2025 йил 5 сентябрь куни Сенатнинг 10-ялпи мажлисида қабул қилинган.
Алишер Усмонов (1964 йилда туғилган) 2022 йил охиридан буён Наманган вилоят суди раиси лавозимида ишлаб келган. Бунгача 4 йил давомида президентнинг фуқаролар ҳуқуқларини ҳимоя қилиш ва мурожаатлар билан ишлаш масалалари бўйича маслаҳатчиси ўринбосари бўлган.
Илгари у Косонсой туман суди раиси, Мингбулоқ тумани прокурори, Наманган вилояти Халқ қабулхонаси мудири лавозимларида ҳам ишлаган.
Шу билан бирга, Икром Муслимов Олий суд раисининг биринчи ўринбосари — жиноят ишлари бўйича суд ҳайъати раиси лавозимидан озод этилди (аввал у 2024 йил сентябрда маъмурий ишлар бўйича суд ҳайъатига, кейинчалик жиноят ишлари бўйича ҳайъатга раҳбарлик қилган).
Бундан ташқари, Нодира Ҳакимова ҳам Олий суд судьяси лавозимидан озод этилди. Июль ойида у президент Администрацияси раҳбари (Саида Мирзиёева)нинг суд тизимидаги ислоҳотлар бўйича ўринбосари лавозимига кўтарилган эди.
Қонунчиликка кўра, Олий суд раиси, Олий суд раисининг биринчи ўринбосари, Олий суд раиси ўринбосари — суд ҳайъати раиси лавозимига президент тақдимотига биноан Сенат томонидан сайланади.
