Reuters ва Politico нашрлари хабар беришича, Албания дунёда биринчи бўлиб сунъий интеллект асосидаги моделни вазир лавозимига тайинлади. Виртуал вазирнинг исми Диэлла (албан тилидан таржима қилинганда «қуёш» дегани).
Албания бош вазири Эди Раманинг айтишича, Диэлла ҳукумат хусусий компаниялар билан шартнома тузадиган барча давлат тендерларини бошқаради.
«Диэлла вазирлар маҳкамасининг жисмонан эмас, балки виртуал равишда сунъий интеллект томонидан яратилган биринчи аъзосидир», — деди Рама ўзининг янги кабинетини таништирар экан. Унинг сўзларига кўра, Диэлла Албанияни «давлат тендерлари 100% коррупциядан ҳимояланган мамлакат»га айлантиришга ёрдам беради.
Reuters нашрининг таъкидлашича, давлат тендерларини ўтказиш Албанияда узоқ вақтдан бери коррупция можаролари манбаи бўлиб келган. Бу Рама 2030 йилгача эришмоқчи бўлган Албаниянинг Европа Иттифоқига киришини қийинлаштирмоқда.
Politico нашрининг ёзишича, Диэлла боти Албания аҳолисига таниш, чунки у e-Albania давлат хизматлари платформасида ишлайди. Унинг анъанавий албан либосидаги ёш аёл шаклидаги аватари мавжуд.
