Akfa Group компанияси Туркия компанияси билан ҳамкорликда Кентукки штатида (АҚШ) йирик ишлаб чиқариш мажмуасини қуришни бошлади. Бу ҳақда компаниялар гуруҳи асосчиси Жаҳонгир Ортиқхўжаев «Ўзбекистон 24» телеканалининг «Менимча» дастурига берган интервьюсида маълум қилди.
Унинг сўзларига кўра, янги заводда алюминий маҳсулотлари, автомобиль эҳтиёт қисмлари, қуёш панеллари ва деразалар учун бутловчи қисмлар ишлаб чиқарилади.
«Биз алюминий маҳсулотлари, автомобиллар, қуёш панеллари ва деразалар учун эҳтиёт қисмлар ишлаб чиқариладиган завод қурилишини бошладик. Биринчи йилда 105 млн доллар инвестиция жалб қилинади. Умуман олганда, АҚШдаги заводга киритиладиган инвестицияларнинг умумий ҳажми 600 млн долларни ташкил этади», — деди тадбиркор.
Жаҳонгир Ортиқхўжаев 2018–2023 йилларда Тошкент шаҳри ҳокими лавозимида ишлаган. Бугунги кунда у O’zgazloyiha, J-United Group, Ekzotella, Akfa Logistics, Tourism And Entertainment Group, Akfa Engineering And Management, Greensun Element Group, Akfa Dream World, Artel Electronics, Build Infinity, Akfa Accessories, Primary Enterprise, High Level Investment, Infinity Confidence, Akfa Aluminium, Dreams Island, Adw-International Congress Hall, Osten Technologies, Jahon School Maktabi ва бошқа компанияларнинг муассиси сифатида кўрсатилган. Ушбу МЧЖларнинг баъзилари бошқа компанияларга эгалик қилади.
2024 йил декабрь ойида тадбиркор президент билан учрашувда пойтахтда «ягона экотизим доирасида» 1200 ўринли 6 та янги меҳмонхона очиш режалари ҳақида хабар берган эди. Шунингдек, у Кливленддаги Америка тиббиёт маркази билан ҳамкорликда йирик клиника қуришни режалаштирмоқда.
