Москвадаги 2-Ғарбий округ ҳарбий суди РФ Қуролли Кучлари радиацион, кимёвий ва биологик ҳимоя қўшинлари бошлиғи Игорь Кирилловнинг ўлимига сабаб бўлган террорчилик ҳаракатини содир этишда айбланаётган Ўзбекистон фуқароси Аҳмаджон Қурбоновни умрбод озодликдан маҳрум қилиш ҳақида ҳукм чиқарди. Шунингдек, унга 1 миллион рубль миқдорида жарима тайинланди, деб хабар бермоқда РБК 2026 йил 21 январь куни.
Қурбонов жазо муддатининг дастлабки 10 йилини турмада, қолган қисмини эса махсус тартибли колонияда ўташи керак.
Суд иш бўйича яна 3 нафар иштирокчига нисбатан ҳам ҳукм чиқарди. Батухон Точиев 22 йилга, Рамазан Падиев ва Роберт Сафарян эса тегишлича 18 ва 25 йилга озодликдан маҳрум этилди.
Қурбонов жиноятдаги айбига тўлиқ иқрор бўлди, Сафарян эса қисман тан олди. Падиев ва Точиев айбларини тан олмадилар.
Игорь Кириллов ва унинг ёрдамчиси Илья Поликарпов 2024 йил 17 декабрь куни эрталаб Москвадаги Рязань проспектида жойлашган генералнинг уйи яқинида тўхтатиб қўйилган электросамокатга ўрнатилган қўлбола бомба портлаши оқибатида ҳалок бўлган эди. Қурбонов портлашдан бир неча соат ўтгач қўлга олинган.
Россия Тергов қўмитасининг таъкидлашича, сўроқ пайтида Қурбонов «Украина махсус хизматлари томонидан ёлланиб», жиноятни содир этгани учун унга 100 минг доллар ва Европа давлатларидан бирига чиқиб кетиш ваъда қилинганини айтиб берган. Ҳуқуқ-тартибот идоралари маълумотларига кўра, Точиев ва Падиев Қурбонов учун хостелдан хона ижарага олишган, Сафарян эса унга Польшадан етказиб берилган портловчи мослама компонентларини топширган.