Ўзбекистонда атом электр станцияси қурилиши лойиҳаси бўйича жамоатчилик эшитувлари 2025 йил 23 декабрь куни Жиззах вилоятининг Фориш туманида бўлиб ўтади, деб хабар берди Вазирлар Маҳкамаси ҳузуридаги Атом энергияси агентлиги («Ўзатом»).
Лойиҳа ВВЭР-1000 (катта) ва РИТМ-200Н (кичик) реакторларидан иборат АЭС қурилишини назарда тутади. Аввалроқ объект иккита катта ва иккита кичик реактордан иборат бўлиши хабар қилинган эди.
Объектнинг қуввати 2110 МВт бўлиб, тўлиқ ишга туширилгандан сўнг йиллик электр энергияси ишлаб чиқариш 16–17 миллиард кВт⋅соатга, Ўзбекистон энергия балансидаги улуши эса 12–15 фоизга етиши керак. Ҳисобланган эксплуатация муддати — 60 йил. Қурилиш даврида 13 мингтагача, эксплуатация даврида эса 2000 тагача янги иш ўрни яратилиши кутилмоқда.
Лойиҳанинг бош пудратчиси — Россия давлат корпорацияси «Росатом»нинг инжиниринг бўлинмаси бўлган «Атомстройэкспорт».
Аввалроқ «Ўзатом» раҳбари Азим Аҳмадхўжаев биринчи бетон қуйиш (станциянинг ўзини қуриш) 2026 йил баҳорига режалаштирилганини маълум қилган эди.
Ўзбекистон ва Россия 2018 йилда АЭС қурилиши бўйича келишув имзолаган. Дастлаб ҳар бирининг ўрнатилган қуввати 1,2 ГВтгача бўлган иккита катта энергия блокига эга станцияни Россия лойиҳаси бўйича қуриш режалаштирилган эди. Жой сифатида Жиззах вилоятидаги Тузкон кўли яқинидаги майдон танланган.
2024 йил май ойида томонлар лойиҳани атом муз кемаларида қўлланиладиган РИТМ-200 реакторларидан фойдаланган ҳолда кичик қувватли АЭСдан бошлашга қарор қилдилар.
2025 йил сентябрда АЭС комбинациялашган бўлиши ва ўзига катта станцияни — умумий қуввати 2 ГВт бўлган иккита реактордан ва кичик станцияни — 110 МВтли иккита реактордан иборат бўлиши ҳақида хабар берилган эди.
Лойиҳа қиймати 1 миллиард доллардан ошмаслиги маълум қилинган.
